Bertsotan gozatzeko gogoz zihoala BECera ere adierazi zuen, eta zintzo bete du hitza, goizean zein arratsaldean ere. Pozez itzul daiteke etxera egindako lanagatik, ez bakarrik Barakaldoko finalean, baita txapelketa osoan ere.
Egun osoan, eta batez ere arratsaldean, kartzelako gaian, nabaritu zaio bere bertsolari ibilbideko unerik eztienean dabilela, eta goi-goian aritzeko asmoz joan dela finalera. Honako gaia jarri diete bertsolariei: “Gaztetan ez zenuen ikasteko aukerarik izan. Urtetan aurrera zoaz, eta orain ikastea erabaki duzu".
Ikus eta entzun Aitorrek kantatu dituen hiru bertsoak, EITBk sarean jarri duen bideoan:
Bertsoaldi bikain horri eta aurretik egindako gainerako saioei esker, buruz burukora sailkatzeko txartela lortu du, merezimendu osoz, Maialen Lujabiorekin batera.
Buruz buruko azken saio horretan, bertso batean kantatzeko gaiari dagokin atalean, hitz batera makurtu behar izan dute Lujanbiok eta Mendiluzek. Hitza: izerdia. Eta kartzelako lanean, berriz, honako gairi heldu behnar izan diote: "Bada orduerdi auto bera atzetik duzula".
Hona Mendiluzek egin dituen bi saioak, EITBk jarri duten beste bideoetako batean :
Agurra, belaunaldien transmisioari eskainia
Behin sailkapena jakinarazi ostean zortzi bertsolariek kantatu dituzten agurretan, etxekoei, bi seme txikiei (Jon eta Arkaitz), 80ko hamarkadan sortu zen Hernaniko Bertso eskolako sustatzaile nagusi, Juanjo Uriari, eta bertsolaritzaren unibertsoa egunez egun hauspotzen duten pertsonak izan ditu gogoan.
Etxekoei ta Jon eta Arkaitz
Zuei denen izenean
Ta bide hontan zoazten denoi
Eskutik aldamenean
Bihar etziko bertsolariei
Segi hazten orainean
Ta zuri Juanjo zurekin hasi baitzen iraganean
Galtza motxak neuzkanean (bis)
Bihar goizean esnatu eta parra pasa denean
Berriz sinisten segi dezagun eguneroko lanean.
Zalantzarik gabe, hamar urteko mutiko haren oroitzapenak etorri zaizkio gogora Aitorri. Andoaingo ikastolan nola jaso zuen bertsoari buruzko lehenbiziko azalpena; nola geratu zen txoratuta hitzekin eta ideiekin jolasteko balio zuen ahozko ariketa harekin; nola eskatzen zion amari (Axun Gonzalez) behin eta berriro murgildu nahi zuela bertsoaren sorginkerian; amak nola eramaten zuen eskutik hartuta Hernaniko bertso eskolara autobusean astean behin; nolako arretaz jarraitzen zituen Juanjo Uria irakaslearen irakaspenak…
Eta aldi berean, bertsolaritzak bizi duen etengabeko transmisioari egin nahi izan dio keinu Aitorrek. Etxetik hasita, Aitorrenean islatzen den belaunaldiz belaunaldiko transmisioa; izan ere, Justiniano Mendiluze zenak egin zuen bertsotan, bere seme Aitor Mendiluzek egiten du bertsotan, eta nola egin ere, eta honen seme Arkaitzek ere ekin berri dio bideari.
Kartzelakoa
Hitza emanda, bederatziko txikian bertso bakarra
Hitza: Izerdia
Izerdia ze izerdi askoren galdera
Lehenego begiratu besape aldera
Ni konturatu gabe humeldu ote da
horko batzuenak bai, dexente gainera
Baino hemen norbera
Ta ze egoera
Kezka da sobera
Ta izerditzen gara
Baino denonak ez du balio bera
Hiru bertsotarako gaia: Bada orduerdi auto bera atzetik duzula
Etxetik ezin lasai atera
Ezin lasai joan lagun artera
Ez lanera ta ez umeekin arratsaldean parkera (bis)
Beti gertu nor ote da
Nor da gurekin batera
Hara berriz auto bera
Noiznahi gelditu noiznahi miatu maletaro barrenera
Bat ohitu ere egin daiteke susmagarri izatera.
Garai batean eta
Orain ordea hortatik lasai
Baina besteek jarraitzen dute
Erbia noiz altxako zai
Lanak lan, garaiak garai
Pakeak bidean darrai
Ta ez dira ulertzeko gai
Herrigintzatik eraikitzeko ahaleginean nabil bai
Agian hori da arazoa ez dute eraikitzerik nahi.
Zenbat iritzi ta zenbat proba
Ta zenbat gezur batzuk ahora
Baina aldatzen hasteko unea
Ere ez al da izango ba
Hara ona bera gora
Zer zatoz nere ondora
Ez galdu zure denbora
Edo bai galdu zu hor ikusiz barre egingo det gustra
Ni ez baldin banaiz mugitzen dena beste norbait izango da