Ekintzailetzari eduki sozial, kooperatibo eta eraldatzailea eman nahi dio KoopFabrikak, tokian tokiko sareen garrantzia abiapuntu hartuta. Horretarako, hiru profiletako jendeari zuzentzen zaio programa:
- Proiektu edo ideiaren bat lantzen edo martxan jarri nahian direnei.
- Orain arte elkarte forman jardunean aritu arren, profesionalizatu edo beste era batera antolatu nahi duten taldeei.
- Enpresen baitako barne-ekintzailetza proiektuei dimentsio sozialetik ekiteko asmoa dutenei.
Formakuntzan arlo teoriko komuna lantzeaz gain, ekintzailetza sozialerako tresnen erabilpenean trebatu, eta KoopFabrikatik irtendako proiektuei tutoretza eskainiko zaie garapen eta saretzerako.
Programan parte hartzea doakoa da, baina plaza mugatuak daude. Datozen asteetan parte-hartzaileekin elkarrizketa fasea irekiko da. KoopFabrikak dei egin nahi die proiektu bat elkarlanean garatu nahi duten pertsona, talde edo enpresei formazio eta saretzerako tresna izan nahi duen KoopFabrikan izen ematera koopfabrika.eus webgunean.
Proiektua LANKI Ikertegia eta Olatukoop Interkooperazioa eta Ekonomia Sozial Eraldatzailea sustatzeko sarearen elkarlanetik sortu da. Beterri-Buruntzan, Olatukoop sareko kooperatibek dinamizatuk dute lurralde nodoa. Gipuzkoako Foru Aldundiak finantzatutako egitasmoak Beterri-Buruntza Udalaren babesa izango du, besteak beste.
Interesatuek Twitter, Facebook eta Instagramen izango dute proiektuaren egunerokoaren berri. Informazio gehiagorako posta elektronikoa komunikazioa@koopfabrika.eus edota telefono zenbakia 688 845 940 edo 943 25 63 47 (Andoni Egia).