Abesbatza eta musika talde etorri ziren Andoainera, kutsu herrikoia duten Gabonetako kantuak berritzera Basterora: Galiziako Etxea (Donostia), Monfrague Extremadurako Etxea (Errenteria), Aragoiko Etxea (Donostia), Extremadurako La Jara Etxea (Tolosa), Semblante Andaluz (Lasarte-Oria) eta Extremadurako Etxea (Donostia). Horiekin batera, Andoaingo Triana, Alberto Agirre eta Olagain Udal Txistularien Elkarteak jardun zuten. Alberto Agirre eta Olagain taldeek elkarrekin jardun zuten, euskal kantutegiko zenbait abestirekin popurri bat eginez; Joxe Mari Oiartzabalek zuzendu zituen bi taldeak.
Bi ordu eta erdiko iraupena izan zuen jaialdiak Joxe Ramon Berrondo herriko musikariak aurkeztuta, eta bitarte horretan Estatu espainiarreko hainbat lurraldeetako kantutegian errotuta dauden abestiak interpretatu ziren. Kontzertua amaiturik, oroigarri ugari banatu zituzten Triana elkarteko kideek. Jaialdian parte hartu zuten bederatzi taldeei ez ezik, Esti Mujika Andoaingo Udaleko Kultur ordezkariari, Gipuzkoako Etxe Erregionalen elkarteko kideei eta Joxe Ramon Berrondo jaialdiko aurkezleari ere eskaini zieten oroigarria. Azkenik, jaialdiaren antolaketan buru belarri jardun duen Luis Gil Triana elkarteko kideari bereziki eskerrak eman izan zizkioten. Lanean isilean ibiltzen den kultur eragile horietakoa izan arren, oholtzara lotsaturik igo behar izan zuen behingoz.