Unai Ormaetxea gai jartzailearen agindutara, pertsonai ugariren larrutan sartu behar izan zuten lau bertsolariek, eta arrazoi politak bota zituzten: Errealeko entrenatzaile eta jokalariak, esne banatzaile tradizionala eta modernoa, haurrari izena jartzeko orduan xextra daukaten gurasoak, Katalunia, whatsapp bidez lotsatzeko moduko argazkia bidali dioten neska gaztea…
Gauean entzun ziren bertsoaldi guztietatik, grazia eduki zuenetako bat transkribatu dugu, ondoren.
Hona gaia (zortziko handian, hiru bertso kantatzeko): Unai Muñoak eta Ion Belokik bikotea osatzen dute. Haur bat espero dute, eta zein izen jarri ari dira pentsatzen. Horretan, bakoitzak bere ideia dauka; Unaik izen oso euskalduna, garaikidea eta super modernoa nahi du, eta Ionek, berriz, tradizionala eta konposatua, eta santuak baldin badauzka tarteko, hobe.
Unai Muñoa:
Ni modernoa izan nahiz beti.
Beti izan dut klasea
ta zuri beti gustatu zaizu
atzera begiratzea.
Txuria eta beltza gara gu
a ze nolako trantzea!
Nahiko mirari iruditzen zait
gu biak maitemintzea (bis).
Ion Beloki:
Baina haria beste bat degu,
eutsi diezaigon gaiari.
Erlantz esanda gure umea
ezin baita egon hadi!
Imajinatu gure umea
baldin bada bertsolari
askoz hobeto ibiliko da
izena badu Joxe Mari (bis).
Unai Muñoa:
Bizitzan zehar gertatzen dira
mila traba mila trote.
Izenarekin arduratuta
biak gaude tope-tope
ta Joxe Mari behar lukeela
hori, Ion, egia ote?
Ikastolara joaten denean
barre egingo diote (bis).
Ion Beloki:
Baina izenak beti izango du
bere begitan diztira
ta zeozerekin oroituko dira
etorkizunen sikira.
Izen horixe errexago degu
eta ikasten da di-da
Hodei izena jarri ezkero
beti zerura begira.
Unai Muñoa:
Beti zerua, beti santuak,
meritua dezu zuk e.
Egaña kenduta Uztapide
bela jarriko zenduke.
Trikitixa ta txalapartari
ere zenbat buruhauste.
Maitea, jaio behar zenuen
duela berrehun bat urte (bis).
Ion Beloki:
Nik enbidoa botatzen dizut,
zuk atzetikan hordago.
Adostasunik ez degu lortzen,
hori gelditu da klaro.
Tradizionala ni izango naiz,
jarraituko det luzaro.
Nahio Uztapide bera aditzea
Muñoa baino lehenago (bis).
Unai Muñoa:
Beti nerekin saltsan zabiltza,
beti hainbeste disputa.
Eta nik beti bukatu ohi det
depresioak hartuta.
Berdin du Patxi o Joxe Mari
o Maria de Kalkuta.
Zuk nahi dezuna egin ezazu
beti hala egin dezu ta (bis).
Ion Beloki:
Baina hala ere eskua orain
zuri behar dizut luzatu.
Erabakia hartu aurretik
behar degu aklaratu.
Iritzi ezberdin ditugu eta
orain behar degu bukatu.
Hobe degu, bai, Antton jarrita
gehiago izena ez aldatu (bis).