Beñat Iguaran amasa-villabonatarrak Felix Zubia, Ander "Itturri", Nerea Elustondo, Jon Martin eta Unai Gaztelumendirekin batera kantatu zuen Seguran joan den larunbatean, final laurdeneko saioetako batean.
Beñat berria da Euskal Herrikoa bertsolari txapelketan, eta adierazia zeukan aspirazio handirik gabe zihoala. Hasierako agurreko bertsoan, garbi adierazi zion publikoari zein zen bere asmoa, umore finez gainezka: alegia, desio bakarra zeukala, bere buruak Segurako barraskiloak baino azkarrago funtziona zezan. Egia esanda, tamaina politean aritu zen ariketa guzti-guztietan.
Lehenbiziko ariketan, Oier Suarez gai jartzaileak Beñat eta Jon Martin biak jarri zituen lanean, zortziko handian, astebururo bizikletan ibiltzera irteten diren bi txirrindularien rolean. Aurreko asteburuan txirrindulari bat harrapatu zuten bihurgunetik pasa berri zirela gaineratu zien. Bikoteak Segurako saiorik biribilena osatu zuen ziurrenik, sei bertsoko saioa arrazoiez betetakoa. Gogoeta zale gisa agertu zen Martin, pragmatikoagoa Beñat. “Zeinen agudo ximeltzen diren / loreak eta oroimena” kantatuz amaitu zuen lehen bertsoa Martinek. Eta Beñatek, hona nola eman zion errematea, azken bertsoan: “Guk gure martxan jarraitzea da / omenaldirik onena”.
Gaia emanda zortziko txikian egin beharreko ariketan Unai Gaztelumendirekin kantatu behar izan zuen Beñatek. Aireportuko zintaren ondoan maletaren zain zeuden bi ezezagun ziren bi bertsolariak. Halako batean, Unai, Beñaten maleta hartu eta badoa. Egia esatera, nola edo hala jardun zuten batak zein besteak, eta bertso emaria ez zen distiratsuena izan Segurako saioan.
Banaka lanean jarri zituzten sei bertsolariak, hurrengo ariketan; zortziko txikian, puntu-erantzunean. Beñatek, diruarekin eta boterearekin lotutako hiru puntuei egin behar izan zien aurre eta nahiko airoso irten zen guztietatik. Hona lehenbiziko puntua: “Dirua boterea / elkarri lotuta…” eta hara Beñaten erantzuna: “Hori horrela dela / ez nago aztuta / Joan gaitezke kalera / pankartak hartuta / oraingoz beste gauzik / gukin ez degu ta”.
Hamarreko txikian binaka egin beharreko bertsoaldian, Beñatek Felix Zubia izan zuen bide lagun. Hona Suarezek jarritako gaia: “Lagunak zarate Biok duzue diabetesa eta ezin duzue gozorik jan. Felix, izozki denda batean aurretik pasatu zaretenean, Beñatek barrura sartzea proposatu dizu”. Felix zuhurraren paperean jardun zuen, eta Beñatek muzin egin nahi zion zaintzeko neurriak hartzeari. Hara nolako tankeran mintzatu zitzaion Felixi: “Beti gaude begira / gaixotasunera / Hogei urtekin hola / Noiz biziko gera?”.
Kartzelako gaian, goren mailan
Kartzelako gaia heldu zen final laurdeneko saioaren amaierara. Ahotan hartu beharreko gaia, nahiko irekia utzi zitzaien bertsolariei: “Prentsaurrekoan zaude, eta azken galderari erantzun gabe altxa eta aldegin duzu”. Nork bere rolari heldu zion: futboleko entrenatzailea (Unai Gaztelumendi), futbol jokalaria (Nerea Elustondo), bertsolaria (Jon Martin), Katalunia (Felix Zubia eta Ander Fuentes "Itturri"), eta Mikel Goñi pilotari ohia (Beñat Iguaran). Argudioen aldetik Bikain josi zituen Iguaranek hiru bertsoak, ironia erabiliz eta bere buruaren parodia eginez. Publikoaren barre eta txalo beroak eragin zituen horrexegatik.
Konforme erakutsitako mailarekin
Beñat Iguaran hirugarren geratu zen sailkapenean, epaimahaiaren irizpideen arabera: 1. Jon Martin, 673,5 puntu. 2. Nerea Elustondo, 665,5 puntu. 3. Beñat Iguaran 655,5 puntu. 4. Ander Fuentes "Itturri", 629,5 puntu. 5. Unai Gaztelumendi, 620 puntu. 6. Felix Zubia, 594 puntu.
Asebeteta agertu zen Beñat, saioa amaitu bezain pronto. “Gustura geratu naiz orokorrean. Bihotza azkar zihoan; burua, berriz, urduri, baina martxa egokian joan dela iruditzen zait, nahiz eta publikoak esan beharko duen hala izan den ala ez. Euskal Herriko txapelketan erdi ezustekoa emanez sartu nintzen, eta maila polita eman dudalakoan nago, etorri aurretik sinatzeko modukoa. Zer edo zer bagara, eta konforme!”. Bertsolariak beren buruarekin epaile nahiko gogorrak izan ohi dira, Beñat ez da salbuespen: “Puntu-erantzunean pixka bat jaitsi egin naiz, eta bakarkako bigarren bertsoak ere ihes egin dit”.
Kartzelako gaia kantatzeko orduan seigarren, eta beraz, azkena izatea egokitu zitzaion Iguarani. Bertsolariek halakoetan izaten duten buruhaustea eduki zuen Beñatek ere, aurrekoek hautatutako gaia ez errepikatzea alegia. “Katalunia edo Garitano entrenatzailea baten batek hartuko zituela ahotan pentsatu dut, eta aurreko asteetan guztion ahotan ibili den Mikel Goñi etorri zait burura. Bertso entzule gisa eskertzen dut bertsolariak originalak izaten saiatzea, eta hortik jo dut nik”.
Iguaran ez zen oso baikor azaldu 655,5 puntuak eskuratu ostean, finalerditarako txartela lortzeko moduan izango ote zen galdetuta. “jende oso ona dago tartean, eta koadernoa hartu eta zenbakiak egiten hasita, igual bost bat punturen faltan ibiliko naiz sailkatzeko”.
Beñat Iguaranek Seguran kantatu zituen bertsoak
* Binaka, gaia emanda hiruna bertso zortziko handian.
Jon Martin eta biak.
Gaia: “Astebururo irteten zarete bizikletaz ibiltzera. Joan den asteburuan txirrindulari bat harrapatu zuten bihurgunetik pasa berri zarete”.
Jon Martin:
Bihurgunetan bihurgunea
dagoen bihurriena.
Lore sorta bat gogoratzeko
pertsona baten azkena.
Nahiz egun hartan asko ipini
titularretan gorena,
zeinen agudo ximeltzen diren
loreak eta oroimena.
Beñat Iguaran:
Lenago ere egin ditugu
Honelako mila saio
loreak utzi atzean eta
esana diegu aio!
Hain poetiko ez zaitez jarri
oraingoan joan arraio!
Toki askotan gertatzen dira.
Istripua deitzen zaio.
Jon Martin:
Barkatu pixkat dramatizatu
egin bada nire hitza,
baina sentitzen dudan beldurra
ez da batere murritza.
Istripu deitzen diozu, baina
igual nastuta zabiltza.
Deskuido batek akabatzen du
pertsona baten bizitza!
Beñat Iguaran:
Tranpolinetik neronek ere
askotan egin det salto.
Mendira igo, irrista egin,
ai ene, zenbat zartako!
Istripu hoixe, istripua da
eta hola hartu beharko,
bestela askotan gure etxetik
ez ginake aterako.
Jon Martin:
Bulegoraino goiz iristera
bultzatzen gaitu enpresak.
Gure hobbyak azkarrak dira
eta desioak espresak.
Zenbat pertsona hiltzen dituen,
ezin iritxi estresak.
Presak jendea hiltzen du baina
gu beti besteren presak.
Beñat Iguaran:
Besteen presak presa bihurtu
hara hor zure izena.
Baina gu biok barruan degu
kirolariaren sena.
Larunbatean ohean egon
horixe litzake pena.
Guk gure martxan jarraitzea da
omenaldirik onena.
* Binaka, gaia emanda, hiruna bertso zortziko txikian.
Unai Gaztelumendi eta biak.
Gaia: “Bi ezezagun zarete. Aireportuan, maletak jasotzeko zintaren ondoan. Nor bere maletaren zain. Beñat, halako batean Unai ikusi duzu zure maletarekin joaten, Atzetik hurbildu zatzaizkio”.
Beñat Iguaran:
Maleta hartu du-ta
atzetik jarraitu,
nere pausua ez da
askorik lasaitu.
“Bertan jatorrak dituk”
sarri nuen aditu.
Laguntzeko hotelak
bidali al zaitu?
Unai Gaztelumendi:
Maleta hartu eta
nahi nuen aldegin
Hotelak zer ikusik
ez dauka nerekin.
Aireportu honetan
zeudenik ez nekin
Bi maleta Lizason
pegatinarekin.
Beñat Iguaran:
Lizasonakin jarri
nahi nauzu nastuta.
Baino nik lapurreta
ez daukat ahaztuta.
Zer lortuko dezu ba
hori lapurtuta?
Bi galtza motz bakarrik
ekarri ditut ta.
Unai Gaztelumendi:
Lapurreta ez da hau
Gaurko kontu aparta
Orain ere bota dit
gezurra galanta,
maleta hartu eta
ez ote da marka.
Bi galtza edukitzeko
pisu asko dauka.
Beñat Iguaran:
Beraz pisuak egin
dizu enbarazu,
baino horren txulito
ez ipini, aizu.
Banku bat lapurtzera
joaten ba zera zu,
Pixka-pixkat hobeto
prestatu ezazu.
Unai Gaztelumendi:
Lapurretan arian
ni nabil elbarri.
Irribarrerik ezin
eginda elkarri.
Zure maleta hartu
ta bankura korri.
Hutsa eraman eta
beteta ekarri.
* Banaka, lehen puntua emanda, hiru bertso zortziko txikian. Puntu-erantzuneko ariketan
Puntua:
Dirua boterea
elkarri lotuta…
Beñat Iguaran:
Hori horrela dela
ez nago aztuta.
Joan gaitezke kalera
pankartak hartuta
oraingoz beste gauzik
gukin ez degu ta.
Puntua:
Boterea lortzea
askoren desira…
Beñat Iguaran:
bano nekez gabiltza
behar dan neurrira,
hola ezin iritxi
oso urrutira.
Garai hobeagoak
helduko al dira!
Puntua:
Asko duenak ere
asko du galtzeko
Beñat Iguaran:
Zer pentsa ote dezu
hori esateko.
Batzuk zorretan dabiltz
larri edo seko.
Orain degu garaia
hori aldatzeko.
* Binaka, gaia emanda, hiruna bertso hamarreko txikian.
Felix Zubia eta biak.
Gaia: “Lagunak zarete. Biok duzue diabetesa eta ezin duzue gozorik jan. Felix, izozki denda batean aurretik pasatu zaretenean Beñatek barrura sartzea proposatu dizu”.
Felix Zubia:
Diabetesak badu
nahiko enbarazu,
nork bere buruari
egin behar kasu
eta hartu behar da
nahiko konpromezu.
Izozki baten bila
hain gaizki zaude zu,
ospitalean gaixo
bukatuko dezu.
Beñat Iguaran:
Gaixo buka nezake
zure arabera,
hori ezezkoa da
itxuraz kolpera.
Beti azukriakin
gora eta bera.
Beti gaude begira
gaixotasunera.
Hogei urtekin hola,
noiz biziko gera?
Felix Iguaran:
Diabetesa zer den
badakizu zuk e.
Buru gainean bueltan
dauzkagu bi putre,
eta dieta degu
guztion arkupe.
Pixka bat kasu egitia
hobea zenuke,
edo ez dituzu hartuko
hirurogei urte.
Beñat Iguaran:
Belaxe pasa zera,
Felix, atakera
eta urteen kontua
berriro atera.
Beldurrak egotea
normala ote da?
Lasai, iritsiko naiz
laurogei urtera.
Beti nere onduan
egoten bazera.
Felix Zubia:
Besten gainean jarri
dezu zure zama
ta nik izan behar det
kontzientzian arma.
Barka, buka liteke
harreman xarma.
Ajolagabeziak
nekera narama,
barka zaidazu, baina
ez naiz zure ama.
Beñat Iguaran:
Errespetu gutxigo
diot nire amari.
Helatua jango det
ez naiz egongo zai.
Mingaina pasa diot
azkar izozkiai,
ta oraindik txuriago
ipintzen banaiz, ai!
ahoz ahokoa, Felix,
egidazu lasai.
* Bakarka. Gaia emanda, hiru bertso nahi den neurri eta doinuan.
Kartzelako gaia: “Prentsaurrekoan, azken galderari erantzun gabe altxa eta aldegin duzu”.
Artista nintzan txuriz jantzita
pelotari fuerte ematen.
Artista nintzan patxaran, katxi
bat minutuan edaten.
Artista nintzan arrastoaren
gaiñetik oker joaten.
Droga kontu bat dala medio
Ezagun berriro aurten.
Telebistetan irratietan
latzak ari dira esaten.
Behin deskuido bat izango eta,
ze fama jarri didaten (bis)
Zer egingo det pentsatu nahian
etxean lasai egona.
Prentsaurreko bat eman behar det
nahiz ta iruditu broma.
Ordua jarri, lekua jarri,
aurrean zenbat pertsona.
Neregatikan etorri dira
hemengo guztiak ona.
Histori dena kontatuko det
gizona baita gizona.
Eta ea hola garbitzen dedan
lehen nuen fama ona.
Asko dabiltza hartu nahiean
Mikel Goñiren mendeku.
Dena kontatu det ez baitaukat
askok adina sekretu.
Galdera asko erantzun ditut
ze une ta ze momentu.
Baino azkena entzun det eta
sutan barru denak lertu.
Mikel kartzela joango al haiz,
juxtu juxtuan ulertu.
Nik ez det horren erantzunik
epaileari galdetu.