Gipuzkoako Halterofilia Federazioko kideak, Danok Danena taldeko pultsulari eta pultsulari ohiak, Batisek sortutako Beraun taldeko kideak, herri kirolariak, Zizurkil eta Amasa-Villabonako udal ordezkariak..., hainbat eta hainbat pertsona hurbildu zen Batise Kortajarenaren omenez egindako ekitaldira. Hunkituta agertu zen zizurkildarra. Lagun zaharrak besarkatu eta gozatzeko aukera izan zuen eta malko artean, hunkituta, amaitu zuen goiza. Kirol ikuskizunaren baitan, Jon Kepa Kortajarena, Batisen semeak, bere mailako Euskadiko errekorra hautsi zuen 58 kilo jasota.
Urtetan zehar egindako lana eskertu zioten guztiek eta ondoren, elkarrekin bazkaldu eta egun polita pasatzeko aukera izan zuten.