“Afaltzera eseri eta mahaira ateratzen duten sagardoari zure gustuen arabera 5-10 tarteko puntuazioa ematea, ez beste! Beraz, sagardoak dastatzea eta ongi jatea gustuko baduzu, hau da zure txapelketa!”, horrela deskribatzen du Gipuzkoako Sagardogileen elkarteak azken urteetan martxan jarri duen sagardo txapelketa herrikoia. Edonor izan daiteke epaile, beraz, Ontza elkartera agertzeko gonbitea luzatuta dago.
Aurtengo txapelketako finalaurrekoak Ordizian, Andoainen, Zarautzen eta Oiartzunen izango dira; eta finala Azpeitian. Afari kide-epaileek ez dute jakingo zein sagardotegitako sagardoa ari diren dastatzen eta bukaeran jakingo dira irabazleak zeintzuk diren, bai finalaurrekoetan eta baita finalean ere. Datu modura, zera esan daiteke, Euskal Herriko 18 herritako 41 sagardotegik parte hartuko dutela.
Finalaurrekoa Andoainen
Zorterik onena Andoaingo eta Urnietako sagardogileei. Hots, aurtengoan parte hartzen ari diren Elutxeta, Eula, Gaztañaga, Oianume eta Setien sagardogileei.