Hamalau frogez osatutako zirkuituari hiru itzuli eman behar izan zizkioten bi taldeek. Antolatzaileek ikusleen artean banatu zuten orrian zioten bezala, bikoitza zen helburua: bandera hartzea eta ondo pasatzea. Biak ere ederki bete zituzten kirolariek; ikusleek etengabe eman zizkieten animoak, eta amaieran txalo zaparrada batez eskertu zieten Goiburuko joko-zelaian egindako ahalegina.
Hamalau froga jarri ziren jokoan, esan bezala: laia, pirrinka, arrastaka, O.C.R., ingudea (10 altxaldi), soka-saltoa (40), kizkia-sagar, gurpila eramatea, txingak, arto-aletzea, lokotxa, harri-jasotzea (50 kiloko zilindrikoa sei aldiz), ahate-arrantza eta lasto fardoa eramatea.