Urnietako kiroldegi berria eraikitzeko egitasmoa aurrera doa

Erabiltzailearen aurpegia Aiurri 2017ko eka. 30a, 02:00

Sabai Arkitektoak SL enpresak jaso du kiroldegi berriaren egitasmoa prestatzeko aukera. Herritarrek proposamen garailea ezagutu zezaten, Udalak joan zen ostegunean aurkezpen ekitaldia antolatu zuen, Lekaion. Oraindik orain herritarrek ekarpenak egin ditzakete. Horretarako herritarrek uztailaren 7ra arteko epea dute. 

 

Kiroldegia eraberritzea izango da Urnietako azpiegitura mailako egitasmorik handiena, datozen urteetan. Kiroldegi berriaren proiektua lantzeko Sabai Arkitektoak SL enpresak 5-6 hilabeteko epea izango du, eta aurreko astean jendaurreko aurkezpenean adierazi bezala, herritaren azken proposamenak jasotzeko eta aztertzeko prest daude. Udalak zabalduriko oharraren arabera, “oraindik aldaketa batzuk txertatu daitezke promosamenean, eta, hortaz, Udalak epe bat ireki du datorren uztailaren 7ra bitarte herritarrek proiektua hobetzeko ekarpenak egin ditzaten”. 
Horretarako, Bertan bulegora joan eta eskaera orria bete beharko dute.

EGITASMOA LANDU 
OBRAREKIN HASI AURRETIK
Proiektua idatzi ostean, eraikuntza lana egiteko lehiaketa aterako da. Lehiaketa irabazten duen enpresak lanei ekin beharko lioke datorren urteko udaberrian. Bidean ustekabekorik ez bada, eraikitzeko lanek bi urteko iraupena izango dute, eta, beraz, 2020. urteko udaberritik aurrera urnietarrek instalazio berri eta modernoak izango dituen kiroldegiaz gozatzeko aukera izango dute.

IKASTAROAK KIROLDEGIAN
Urnietako Udalak, egitasmo estrategikoen aurkezpenean adierazi bezala, kiroldegiko lanek iraun bitartean ikastaroak eskaintzeko asmoari eutsi nahi dio: “Udala Kiroldegian gaur egun eskaintzen diren ikastaro guztiak mantentzen saiatuko da. Horretarako, futbol zelaiaren inguruan dagoen atletismoko pistan modulu aurrefabrikatu batzuk ezarriko dira. Modulu horiek egungo aretoen neurri antzekoak izango dituzte, eta, beraz, ikastaroekin normaltasun osoz jarraituko da aurrera”. Leku berean eta zerbitzuen kalitate ia berbera  eskaintzen jarraitu nahi dute.

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!