Elorria bedeinkatzera joandako elizkoi ugarik entzun dute Xabier Murua Urnietako erretoreak emandako meza, eta ondoren jaia ospatu da ermitaren kanpoaldean. Zabala eta Larrañaga trikitilarien doinuak entzun dira lehenbizi. Herri kirolen txanda heldu da musika dantzagarriaren ondoren; Peio eta Manolo Cañamaresek aizkora eta motozerrarekin erakustaldi bana egin dute, eta horiekin tartekatuz, Josetxo Urrutia Leitzako harri jasotzaile gazteak neurri eta pisu anitzeko harriak jaso ditu makina bat alditan.
Mendizabal eta Larrañaga bertsolariek saio laburra egin dute. Erromeriaren gaineko kronika bertsotara eraman dute. Tartean, mezako kontuak izan dituzte aipagai.
Mendizabal:
Beste gauza bat aipatu nahi det
Izan baita nobedade.
Meza garaian apaiza eta
aurrean hainbeste jende.
Sermoirik bate ez du egin ta
hori guretzat seinale.
Eta meza bukatua du
limosnarik gabe eska gabe.
Larrañaga:
Guzia hola pasatu da ta
ezin leike disimula.
Apaiz gazteari ezingo diot
egin iseka ta burla.
Baina halare gaurkoa
hutsegite mardula.
Seguru nago atzo gauean
parranda egingo zula.
Mendizabal:
Txistulariek osatu dute
bere kantuen zerrenda.
Gero apaiza eta jendeak
kantu lanari joan da.
Azkenerako meza polita
eta laburra eta izan da.
Barkazioa eskaini digu
Jesusi muxu emanda.
Larrañaga:
Normala da-ta eleiz giroan
Jesusito zuen lagun.
Ezingo gera mezaz aparte
beti kontu hortan jardun.
Leitza aldetik mutil txiki bat
Etorri zaigu indardun.
Azaña latzak egiten ditu ta
Joxetxo aipa dezagun.