Ander Altunak azaldu duenez, "dagoeneko 11 urte dira Aiztondo bailaran ez dagoela txirrindularitza eskolarik. Villabonako Irrintzi izan zen aukera hori eskaintzen zuen azkena. Egoera horri buelta eman, eta txirrindularitza gustuko duten gaztetxoei aukera eman nahi genien". Oarsoaldeako txirrindularitza eskola izan dute eredu. Urko Munduate, Oarsoaldeako eskolako arduradunak eman ditu azalpenak: "Hilero modalitate ezberdina aukeratzen dugu. Eguraldiaren arabera, argi-ordu kopuruaren arabera..., ahalik eta modu egokienean antolatzen saiatzen gara entrenamendu saioak". Zizurkilen ere modalitate ezberdinetan trebatzeko aukera izango dute gaztetxoek, neska eta mutil.
Izena emateko aukera dagoeneko zabalik da, eta momentuz, sei gaztetxok eman du izena. "Danena taldetik gonbitea luzatzen diegu bailarako gaztetxoei; gertura daitezela txirrindularitzara, mutil eta neska".
Martxoan hasiko dituzte entrenamendu saioak, eta irakasleen artean izango da Jokin Alberdi zizurkildarra. "Asteburu honetan Ziklokroseko munduko txapelketa jokatzen ari da Luxenburgen. Erreferente izan daiteke gaztetxoentzat, eta guk luzatutako gonbita onartuz, entrenatzaile lanetan arituko da".