Udal ordezkari hori, agur:
Zugana eta Gipuzkoako gainerako alkate eta zinegotzi guztiengana jotzen dugu Errausketaren Aurkako Mugimenduaren izenean, eskaera zuzen hau egiteko: jakitun izanik Zubietako erraustegiak zure herriari eta herritarrei zorra eta osasun galera besterik ez diela ekarriko, arduraz joka dezazula eskatzen dizugu, eta zure esku dagoen guztia egin dezazula erraustegiaren proiektua geldiarazteko.
Udal ordezkariongana jotzen dugu, udalena delako bere hondakinak kudeatzeko eskumena, eta baita eskumen hori herritarren mesedetan erabiltzeko ardura ere.
Eskaera zuzen honekin batera, Errausketaren Aurkako Mugimenduak gonbidapena luzatzen dizu abenduaren 27an, erraustegiaren eraikuntza eta kudeaketa lanen lizitazioa erabakitzekoa den egunean, Foru Aldundiaren aurrean, Donostian, eguerdiko 12:00etan, Gipuzkoako herriek, herritarrekin batera, egingo duten protesta-ekintzan parte hartu dezazun.
Erraustegia = Heriotza eta zorra
Ez gure izenean!
Errausketaren Aurkako Mugimendua
2016ko abendua