Bertan izan ziren Teodoro Hernandorenaren alabak eta bilobak. Zizurkilgo zenbait herritarrek ere ez zioten hutsik egin hitzordu bereziari.
Kepa Junkerak larunbatean eskaini zuen kontzertu batekin eman zitzaion hasiera Baigorriko Deidarra elkarteak urtero antolatu ohi duen Xalbador Egunari.
Igandean, Xalbadorren baserri eta bordara egin zen txangoak eman zion segida. Ondoren, Joxe Mari Iriondok bi euskaltzaleen inguruko hitzaldia eskaini zuen. Hernandorenak ekintzarako zeukan grina goraipatu zuen Iriondok, eta hark makina bat eremuetan musutruk egindako lana xehetu. Besteak beste, euskalgintzan, bertsogintzan, euskal aberringintzan, euskal filmografian eta pilotaren jokoan aritu zen Hernandorena.
Ospakizunean parte hartu zuten euskaltzaleek gogoan eduki zuten bai Hernandorenak eta baita Emile Larrek nola egin zituzten egundoko ahaleginak Iparraldean bertsolaritza hauspotzeko. Urrutira gabe, Hernandorena izan zen Mattin eta Xalbador oholtzara kantatzera animatu zituena.
Urepeleko plazan euskal dantzekin eta herri kirolen apustuarekin gozatu hartu ostean, herri bazkarian bildu ziren Xalbador Egunera bertaratutakoak.
Esker oneko bertsoak
Arzallus, Lizaso, Loidisaletxe eta Gurrutxategik bertso saio bikaina eskaini zuten bertsozaleek kafea hartzen zuten bitartean.
Iriondok eskatu, honako bertsoak abestu zituzten agurrean, bi omenduak gogoan hartuta Agurrean:
Arzallus:
Ez baitzen bakarrik bizi
Urepeleko artzaina
Teodoro ta Emile
Laguntza on baten ordaina.
Bata dentista izan zenuen
Bestea apez bikaina.
Batek zuzentzen zizkion hortzak
eta besteak mingaina.
Lizaso:
Zizurkilen jaio omen
liburu askok diona.
Euskaltzale, bertsozale
ta sentimendu sakona.
Bertsoan alde jirabiraka
ibiliagatik hona.
Gorputz txikia bazuen ere
Itzal handiko gizona.
Loidisaletxe:
Euskararen alde ziran
nolabait hauek biziak.
Beren denboran gauz asko
erakutsi eta pasiak.
Ez da posible euskaltzaleek
Burutik hauek kentzia
gaur omendutzen ditugun hiru
gisako eminentziak.
Gorrotxategi:
Bata hemen jaio zan ta
bestea berriz jaio han.
Bizi guzia pasatu
euskeran alde beti plan
Hainbat izerdi eta hainbat neke
beti euskeraren jiran.
Euskarentzat bizi ziran ta
euskerarentzat hil ziran.
Euskal Herriaren historian, pertsona gutxik berdinduko dute Teodoro Hernandorena euskalgintzaren aldeko lanean. Edonor txunditzeko moduko ekimen pertsonalez hornitua dago bere biografia.
Egun, bere izena daraman haur eta gazteen ipuin lehiaketa egiten da Zizurkilen; Iparraldean, berriz, bertsolari gazteen lehiaketa. Aldi berean, bere izena darama Zizurkilen euskal kulturaren alde diharduen elkarteak.
Hernandorenaren izanaren eta ekinen gainean gehiago jakiteko, bi liburu-biografietara jo daiteke:
- IRIONDO, Joxe Mari: Teodoro G. Hernandorena (1898-1994). Bidegileak bilduma, 2004.
- LASA, Xabier, Begi kolpea. Teodoro Hernandorenaren biografia. Larramendi Bazkuna, 2008.