Peru eta otsoa
Didau Antzerki Faktoria
Sergéi Prokófiev musikari ukraniarrak 1936an konposatu zuen Peru eta otsoa ipuin musikatua, musika sinfonikoa haurrei modu dibertigarri batean hurbildu nahian. Ipuin errusiar klasiko honen pertsonaiak hartu, eta bakoitzari orkestako instrumentu bat egokitu zion errepresentazio modura.
Honela, Peru orkestako hari-instrumentuen bidez azalduko zaigu: Peruren laguna, txori txikia, zeharkako txirula izango da; zoritxarreko ahatea, oboea; katu zuhurra, klarinete goxoa; aitona, beti marmarrean, fagota; basoan bizi den otso handi grisa, tronpak; eta azkenik, basoan dabiltzan ehiztariak, tinbalak eta bonboa. Eszenatokian, zuhaitz eder bat eta gramofono baten laguntzarekin ipuina kontatuko diguten bi pertsonai xelebre.
Peru eta Otsoa ipuin sinfonikoa atenporala da, eta haurrentzat egin den sinfonia garrantsitsuena, oraingoan DIDAU antzerki faktoriaren bertsio berezian.