Goizeko 10:00etan hasita, egun osoan zehar ekintza ugari izango dira Goikoplazan. “Diana, argazki rally-a, ekintza gastronomikoak, pilota partidak, musika... Denetarik izango da eta herritar guztiak gonbidatuta daude ekitaldi hauetan parte hartzera”, gonbidatu du Ainhoa Aiertzak.
“Musika, dantza, umorea, janaria… ezer ez da faltako egun horretan”, adierazi du Ainara Rodriguezek. Egun seinalatuak, gainera, bere abesti propioa du. Jon Oiartzunen musikak eta Garazi Kamioren hitzak osatu dute kantua. Garazi eta Rebekak abestuta, sare sozialetan entzun daiteke jada.
Andoaindar guztien eguna
Andoainen euskararen ezagutzak gora egin arren, euskararen erabilera ez da neurri berean igotzen. Azken datuen arabera, andoaindarren %18ak darabil euskara kalean.
Datu hauek “aldatu eta irauli” egin nahi dituzte, euskara dakitenen eta erabiltzen dutenen kopuruak gora egin dezan. Herriko zenbait eragilek euskararen egunaren bueltan hainbat ekimen antolatu izan dituzte, helburu eta ezaugarri askotarikoak. Orain, ordea, ezagutzatik erabilerara salto egin nahi dute: “Herriko kaleak euskaraz bustitzera gatoz”.
Andoaindar guztien eguna izatea nahi dute; beraz, herritar guztiak parte hartzera gonbidatu nahi dituzte. “Argi dugu gure herria euskalduna dela eta gutako bakoitzaren indarra behar-beharrezkoa dela euskarak aurrera egin dezan. Beraz, gonbitea luzatzen diegu andoaindar guztiei parte hartu dezaten”.
Egitaraua:
10:00 Umeentzako lantegiak
10:30 Herrian zehar DIANA
11:00 Argazki-rallyan izen ematea
12:00 Herriko elkarte gastronomikoen arteko lehiaketa
12:00 Neska eta mutilen pilota partidak Kontzejupean
12:30 Sagardo dastatzea Irati Amondarainek gidatuta (aurretik tiketak erosi ATARIAn)
13:30 Patata tortilla lehiaketa (etxetik ekarri egina)
14:00 Mokadu tartea (Elkarteek egindakoaren eta patata tortillen dastaketa
14:30 Musika: Fino’s Band
16:00 DINGO!!
18:00 Andoaindarrak Izar
19:00 Eromeria
19:30 Pintxo poteoa + kantu kalejira + bertsolariak
22:30 BasqExtremFolk musika eta antzerki ikuskizuna
23:30 Zo-zongo!!! ikuskizuna