Han zen lehenengo telefonoa,
ta haren kable kixkurra.
Kanpaiak eurek jotzen zituzten,
dardarka jarriaz lurra.
Nola ahaztu hango kroketak,
hango arratoi txakurrak?
Haur, gazte eta zaharrenentzat
estalpe goxo xamurra.
Ai! Pantxikane zer da guretzat
ez da zerrenda laburra.
Historia handiko taberna bat ta
herri giroan ikurra.
Ama Pilarren sukalderako
gogo ta afizioa,
Milagritosen fundamentua,
Marinesen akzioa,
Joxemariren hizketa garbi,
kontutako bizioa,
bateko kafe, besteko pintxo,
besteko infusioa.
Me(re)zi dezue eta hauxe da
herritarron desioa:
osasunean goza ezazue
zuen jubilazioa.
Zaharrentzako xarma bazeukan
meza ondoren joateak,
umeentzako a ze plazerra
gusanitoak jatera!
Batzuk ireki, besteak itxi,
aurrera darrai kateak.
Hura itxi da, ta ze hutsune
Zizurkilgo gizarteak!
Ea ba jabe berriak hartzen
ditun hango teilapeak,
berriz zabalik nahi ditugu-ta
Pantxikaneko ateak!