Desafioan aurkari izango dira Garagardo Azoka antolatzen duten bi eragile nagusiak. Alde batetik, Gazteleku pilota eskola eta, bestetik, auzoetako jai batzordeak. De Miguel eta Rodriguezek Gazteleku ordezkatuko dute, eta De Muniainek eta Loiartek herriko auzoetako jai batzordeak. Jokoa eta txantxa uztartzen duen lehiaz gain, maila handiko partidak izango dira asteburu osoan zehar. Ostiralean Iturzaeta memorialeko finalak jokatuko dira. Larunbatean, berriz, profesional mailako zesta pilotariak arituko dira.
Aurten Gazteleku pilota eskolako kideekin batera, antolaketa lanetan murgildu dira auzoetako jai batzordeak. Garagardoak zerbitzen eta otorduak prestatzen eta zerbitzen, beraz, auzoetako eragileak ibiliko dira. Larunbatean eta igandean bazkariak eskainiko dira.
OLAJAUN GARAGARDOA
Aurtengo Garagardo Azokan Andoaingo tabernaren izena daraman garagardoa dastatu ahal izango da, Barañainen bertan ekoizten dena.
Flandriako garagardo baten botila kopuru mugatua ere eskainiko dute. Botila bereziak dira Eskoziako, Kataluniako, Flandriako eta Euskal Herriko banderak daramatzalako.