Jai giroko giza-katea, erraustegiaren aurka

Azken ekitaldia jendetsua izan zen, eta hango taula gainetik osasunaren aldeko mezuak zabaldu zituzten.
Antolatzaile taldeko Teresa Lopez de Munainek gizarteari mezu zehatza helarazi zion: “Nafarroak ez du erraustegirik, Arabak ere ez. Zergatik Gipuzkoak bai? Zu, gizarteko kide bezala, ondo dakizu, guk bezain ondo, ez zenukeela nahi erraustegi bat etxe ondoan. Badakizu txosten epidemiologikoek zer dioten: errustegiak minbiziaz hiltzeko arriskua dakar. Zuretzat nahi ez duzun hori ez ezazu onartu beste gipuzkoarrentzat ere. Lagun gaitzazu. Olatua handitu besterik ez da egingo aurrerantzean eta zure laguntza ere behar dugu. Denon artean geldituko dugu”.
Osasuna eta Errausketa Ikerketa Taldeko kide Xabier Mitxelena medikuak ere parte hartu zuen: “Medikuak garen heinean azpimarratu nahi dugu  erraustegiak osasunerako kaltegarriak direla. Nazioarteko foro zientifikoetan argitaratutako hainbat eta hainbat ikerketa aztertu eta gero, hau ondorioztatu dugu: Erraustegi baten inguruan bizi diren herritarrek malformazio, aborto, minbizi eta heriotza tasa altuagoak dituzte. Behin eta berriz ematen da emaitza hau, erraustegi zaharrekin eta baita erraustegi modernoekin ere”.