Gazte festetan lehen martxa egokitua egin dute, Zanpatuz eta Korrikalaris a tope elkarteekin batera antolatu dutena. Astearte goizean aurkezpen ekitaldia egin zuten Lekaion eta adierazi zutenez, hirurehundik gora partaide espero dituzte.
Larunbatean, arratsaldeko 16:00tan Etxeberri plazatik abiatuko da eta bost kilometrotan zehar herrigune ondoko mendialdean ibiliko dira. Izen-ematea arratsaldean bertan egin ahal izango da, plazan bertan. Ekimen solidarioa behar bereziak dituzten haurren aldeko ekimenak finantzatzeko erabiliko da. Pausokako kideek Udalaren eta Caixaren laguntza eskertu zuten. “Ibilbide erraza da, baina mendia zapaldu nahi dugu. Familia normalek egiten duten hori egin nahi dugu eta horretarako Zanpatuz eta Korrikalaris a tope elkarteen laguntza eskertu nahi dugu, edozein oztoporen aurrean laguntza eskainiko baitigute”.
Ibilbidea: Plaza Etxeberri, Presentacion de Maria, trenbide gaineko zubia, Iturbe, Kanposantuko aldapa, Hernaniko institutua, Moko, Vegasa, Idiazabal.
Ibilbidea amaituta merienda eskainiko diete parte hartzaile guztiei. Eta, jarraian, Gazte festetako gainerako hitzorduetan murgiltzeko aukera izango da.
Dagoeneko Pausoka Gipuzkoa osoko eremua hartzen duen elkartea da, gaixotasun ezberdinak dituzten 80 umeren prozesu fisikoan eta kognitiboan sakontzeko sortu dena. Tratamendu integrala eskaintzen diete gaur egun, Hernanin duten egoitza nagusian. Are gehiago, dagoeneko elkartea haur horien familiei ere laguntza ematen hasi da. Elkartea, beraz, handituz eta osatuz doa.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!