Larruzko palan, Ibon Altunak eta Manex Letek osatutako bikoteak 35-25 garaitu zuen Arantzegi-Olaran bikotea. Pala motzean, berriz, Ibai Iradik eta Aritz Rekaldek 40-32 irabazi zuten Arrieta eta Garridorekin aurka. Bigarrengo partidua izan zen lehiatuena; nahiko parekatua gertatu zen azken aldera arte, Iradi aurrelariak berezkoa duen teknika eta indarra erakutsi, eta partidua bertakoen alde hautsi zuen arte.
Andoaingo taldeak lehendik ere badaki zer den Gipuzkoako herriarteko txapelketako finalera iristea, baita irabaztea ere, eta faboritotzat jotzen dira kanporaketan. Nolanahi ere, Arrateko frontoiaren aldean, neurri txikiagoak ditu Olaberriakoak, eta hartara egokitzeko lanak izango dituzte. Zailtasun hori gaindituz gero, gauzak erraztuko zaizkie andoaindarrei.