Larramendi Kultur Bazkunak martxoaren 12an egin zuen XXVII. Biltzar Nagusian, Ohorezko lehendakari izendatu zuen 2014ko abenduan zendu zen Mari Juli Azkue Arrastoa asteasuarra.
Datorren maiatzaren 19an, ostegunarekin, Bazkuneko kideek ekitaldi goxoa eskainiko diote Asteasuko udaletxeko ekitaldi aretoan, arratsaldeko 19:00etatik aurrera. Ekitaldian zehar, Ohorezko lehendakari izendatu izanararen agiria emango diete Bazkuneko kideek Mari Juli zenaren senideei. Modu horretan, Manuel Larramendi Kultur Bazkunaren egitasmoa sortzeko eta garatzeko, Mari Julik hogeita bi urtez egin zuen lan arduratsu, kementsu eta eraginkorra eskertu nahi diote bidelagun izan zutenek ekitaldian zehar. Bai Asteasu edota Beterri eskualdeko ekimenei lotuta egin zuen lana nahiz Euskal Herri mailako ekimenei lotuta egin zuena ere. Ezagutzen zutenek badakite Mari Julik bere onena ematen zuela abiatzen zituen egitasmoetan.
Halaxe laburbiltzen dute Larramendi Bazkuneko kideek zuzendu dizkioten ondoko lerrook ere:
Argi zintugun eta buru
baina eztiaren urrea;
gogo sendo eta irmoz
maitasunezko adorea.
Unerik zailen zitalenetan
zuk bai zabaldu bidea!,
ezin munduko lagunartean
adiskiderik hobea;
izadiaren pozkida oldartsu,
naturaren kolorea.
Guregan zinez zaude josita
Marijuli bai, gurea!
Musika doinuak
Asteasuko txistulari taldeak, Juan Tapia trikitilariak, Lorratzak taldeak, Bide ertzean taldeko Imanol eta Jon Ander Ubeda anaiek nahiz Mujika-Dumalldarrek (Izarbe, Iñaki, Josu eta Xabin) doinuz jantziko dute omenaldi ekitaldia.
Ateak zabalik aurkituko ditu ekitaldira gerturatu nahi duen edonork. Hala ere, lekuarekin arazorik izan ez dadin, etortzeko asmoa dutenek aurrez jakinarazteko eskatu dute antolatzaileek: bazkuna@larramendi.org / 656 782 521.
Maiatzak 19, osteguna
Asteasuko Udaleko ekitaldi aretoa. 19:00etan.