111 Akademiako akademiakideek hautatu eta izendatuta, Katixa Agirrek idatzi
eta Elkar argitaletxeak plazaratutako Atertu arte itxaron eleberriak jasoko du 2015eko
111 Akademiaren Saria. Hiru bozketa txandetan garatu da aukeraketa prozesua,
urtarrilean hasi eta apirilaren 23an amaitu dena. Lehenengo txandan, 2015ean gogokoen
izan zuten liburuaren alde bozkatzeko eskatu zitzaien 197 akademiakideei, eta lehen
txanda hartan saridun izendatzeko behar zen botoen %30a lortu zuen obrarik egon ez
zenez, akademiak ohiko prozedura jarraitu eta beste bi bozketa txanda egin zituen.
Hirugarren eta azken txandan Katixa Agirreren Atertu arte itxaron eta Ramon
Saizarbitoriaren Lili eta biok izan ziren bi finalistak, eta Agirreren lana suertatu da
garaile.
Gauzak horrela, orain irabazleari saria ematea baino ez da geratzen. Maiatzaren
5ean ospatuko da 2015ko 111 Akademiaren Saria ezagutzera emateko ekitaldia,
Andoaingo Bastero kulturgunean, arratsaldeko 19:30ean.
Atertu arte itxaron
Road Movie antzeko bat Euskal Herrian barrena. Uliak bere sorterria erakutsi nahi dio
bikotekideari, eta ibilbide lasai bat prestatzen dute, udan zehar, bigarren mailako
errepideetan, Gustavoren BMW berrian. Dena ez da horren lasaia, ordea. Uliak badu
aitortu gabeko sekreturik, eta bidean topaturiko ezagunen batek ekaitza iragartzen du
bikotearen harmonian, zeruko laino beltzen antzera.
Hauek dira Agirrek 2015eko martxoan liburua aurkeztu zuenetik jaso ditugun
iruzkinetako zenbait pasarte:
‘Puzzle moduan idatzita dago eta hasieran bata bestearekin nola lotzen den
ulertzen ez baduzu ere, gero harrapatu egiten zaitu eta airean eramaten
zaitu, bukaera arte grinaz irakurriz.
‘Urteko liburuetako bat, nire uste apalean’.
‘Liburu hau irakurtzean Joyceren Ulises gogora etorri zitzaidan, atal
bakoitza ezberdina baita eta estilo propioa baitu’.
Iritzi guztiak www.111akademia.com web gunean.