Liburua ibiltariarentzat bidelagun izateko sortu da, oinez irakurtzeko. 17 geltoki eta 7 panel ditu, eta gainera, QR kodeen bidez, azalpenak Atxagaren beraren ahotik entzungai izango dira euskaraz eta gaztelaniaz. Laster, baita ingelesez ere.
Donostia 2016, lurraldearekin elkarrizketan
Donostia 2016k bat egiten du tokiko kultur egitasmo honekin. Donostia 2016k Donostia hiritik harago doan lurraldea barne hartu du, eta eremu zabal horretan hedatu nahi ditu hiriburutzaren balioak. Hala, Muskerraren bideak literaturaren arloan "sentsibilizazio eta sustapen artistikorako dauden beharrei erantzuten die, Asteasuko idazle bikainaren literatur lana eta mundu sinbolikoa publiko orokorrari zabalduz".
Inaugurazioa larunbatean
Azaroaren 28an, proiektukideek Muskerraren eguna antolatu dute Asteasun, asteasuarrei eta bertaratu nahi duen pertsona orori Muskerraren bidea ezagutzera emateko. Goizean hasita, Atxagarekin batera ibiliko dira paseoan, haren azalpenak entzunez. Arratsaldean, idazleak udaletxeko ekitaldi aretoan emango duen hitzaldia izango da abiapuntua, eta hortik aurrera musika nagusituko da. Eguna lagun artean amaitzeko, askaria eskainiko da frontoian.