Gipuzkoako Bertsolari Txapelketako lehenengo finalaurrekoa jokatu zen atzo arratsaldean Zarautzen. Alaia Martinek irabazi zuen saioa eta horrenbestez zuzenean sailkatu zen Ilunbeko finalerako. Agin Laburuk eta Ander Lizarraldek egin zuten bigarren eta hirugarren, hurrenez hurren. Jon Martinen atzetik, bosgarren postuan geratu zen Beñat Iguaran amasarra. 1.200 bertsozalek bete zuten Zarauzko Aritzbatalde kiroldegia. Datorren igandean Tolosan jokatuko da bigarren finalaurrekoa eta beste bost bertsolarirekin batera, hantxe arituko da Oihana Iguaran amasarra:
BERTSOLARIA | PUNTUAZIOA |
Alaia Martin Etxebeste | 504 |
Agin Laburu Rezola | 496 |
Ander Lizarralde Jimeno | 455,5 |
Jon Martin Etxebeste | 451 |
Beñat Iguaran Amondarain | 445 |
Unai Gaztelumendi Arandia | 441 |
Igandean, Tolosako Usabal kiroldegian izango da saioa, Beñat Gaztelumendi, Beñat Lizaso, Iñaki Apalategi, Nerea Elustondo, Oihana Iguaran eta Unai Agirre bertsolariekin.
Saioa 17:30ean hasiko da. Ohi bezala, sarrerak www.bertsosarrerak.eus webgunean dira salgai.
