Auzoz auzoko topaketak amaituta, “partaidetzaren filosofia” berretsi nahi du Udal gobernuak

"Auzoz auzoko topaketak amaitu ziren atzoko egunez. Lehenik eta behin, eskerrak eman nahi dizkiegu bertaratu diren herritar guzti-guztiei; baita ere, udal gobernuan ez egon, baina interesa agertu duten Udaleko kideei. Topaketa hauen inguruan balorazio oso ona egin beharrean gaude. Herriaren lehentasunak zein diren konpartitzeaz gain, herritarren iritziak, kexak, kritikak eta ekarpenak zuzenean jasotzea aberasgarria baita beti. Mahai-gainean jarri ditugun 50 neurriez gain, etxeko lan eta behar berrien zerrenda jaso dugu; horiek guztiak gure egitekoen zerrendan jasoko ditugu orain eta, behar bezala aztertu ostean, irtenbide bideragarriak aurrera eramatea espero dugu.

Hemendik aurrera, beraz, landa lana egitea dagokio udal gobernuari. 50 neurriak zein auzoetan jasotako proposamenak lau urteko programa estrategikoan jasoko ditugu, eta martxan jartzen hasi. Udal gobernuaren asmoa da proposamen bakoitzaren berri ematen joatea webgune eta sare sozialen bitartez, eta, tarteka auzoetan burutuko diren topaketen bitartez.

Bilera hauek amaituta, Udal gobernua partaidetzaren filosofian berresten da. Batzuetan gozoak ez diren gauzak entzun behar badira ere, udal politika herritarrei hurbiltzea guztiz positiboa iruditzen zaigu. Zentzu horretan, parte-hartze dinamikak eta bitartekoak ugaritu behar ditugula uste dugu eta horretan jarriko dugu gure arreta. Udal gobernuak parte-hartzea sustatzeko ezinbestekoa iruditzen zaigun "Partaidetza ordenantza" osatzeko konpromisoa hartzen du eta, onartzearekin batera, baita martxan jartzea ere. Ezinbestekoa da demokrazia ordezkatzailetik demokrazia parte-hartzailerako bidea jorratzen segitzea, Andoain denon artean garatzea baita, ongizateari begira, biderik zentzudunena".