Igandeko ospakizuna jendetsua izan zen, datuei erreparatzea besterik ez dago. Elkartearen datuen arabera, herri bazkarian 900 lagun bildu ziren eta haur ikuskizunaren ia 1500 txartel saldu zituzten. Egunean zehar Pausoka gunetik 5.500 lagun ibili zirela zenbatu dituzte. Datu horiekin Pausoka elkartekoak hunkituta eta eskertuta daude. Nola ez, pozarren daude aurreko igandeko festarekin.
Nekatuta, ospakizunaren ondorengo ajea igarotzen ari dira Pausokako kideak. Maiteder Requejok festaren ondorengo balorazioa egin du Aiurrirentzat: “Ez genuen espero horrelako erantzuna jendearen aldetik. Bultzada handia izan da elkartearentzat eta kostako zaigu hainbat lagunen laguntza eta inplikazioa ahaztea. Hainbeste jende hurbildu zen haur ikuskizunerako ilarak sortu zirela. Barkamena eskatu genuen unean bertan, erabat gaindituta geundelako. Datorren urterako zer hobetu behar dugun ikasi dugu”. Arazo zehatz horiek kenduta, pozarren daude Pausokan: “Hunkituta gaude, eta eskerrak ematea dagokigu. Behar adina aldiz esango dugu eskerrik asko”.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!