Urriaren 2an, ostiral honetan, Musikazuzenean atari digitalaren aldeko festa egingo dute Andoaingo gaztetxean. Gaueko 22.00etatik aurrera, The Lookers, Perlak eta Joseba B. Lenoir Gang taldeak ariko dira oholtza gainean. Zuzeneko kontzertuak amaitzean, musika jartzaileak izanen dira, gaualdia borobiltzeko asmoz.
The Lookers, Perlak eta Joseba B. Lenoir Gang:
Perlak
Euskal Herriko indie post-punk eszenan sortu zen 2013an Perlak talde zarauztarra, euren kantu bizigarri eta kitzikagarriez publikoa sutsuki erakarriz. Intentsitatea, hurbiltasuna eta berehalakotasuna dira taldearen ezaugarririk nagusienak, sentikortasun handiko tarte gordinak eta ilunak, pasadizo samurrekin trebezia uztartzen dituztela. 2014an aurkeztu zuten euren lehen diskoa, “Perlak” izenekoa.
The Lookers
The Lookers banguardiako Garage Rocka egiten duen hirukote gaztea da. Eskola zaharreko Garage Punk eta Rock Alternatiboarekin ere dute hartu emana. Generazio ezberdinetako jendeak erakartzeko gai izan dira haien benetako zuzenekoekin. The Sonics, Shadows of Knight, New York Dolls. Pixies, Black Lips edo Ty Segall bezalako taldeak gogoko dituzte.
Joseba B. Lenoir Gang
Joseba Baleztena musikaria 2011n hasi zen bakarlari gisa Sexty Sexers taldearen etenaldi batean. Joseba B. Lenoir izena hartu zuen orduan. Egun, bere “gang”-a sortu du, hainbat musikari finez inguratuz: Willis Drummond taldeko Felix Buff baterian eta Xan Bidegain baxuan eta perkusioetan, eta Napoka Iria taldeko Miren Narbaiza gitarra elektriko eta akustikoan, perkusioan eta ahotsean, eta Ander Mujika gitarran eta ahotsean. Rock bizia jotzen dute, blues eta americana melodiekin nahasirik.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!