Errefuxiatuen krisiari aurre egingo dion lan taldea aktibatu du Foru Aldundiak

Martxan da dagoeneko Gipuzkoako Foru Aldundiak errefuxiatuen krisiari modu eraginkorrean aurre egiteko sortutako departamentu arteko lan taldea. Politika sozialak, lankidetza, migrazioa, giza eskubideak, gazteria eta gobernantza arloak hartzen ditu bere baitan eta Markel Olano izango da presidentea. Lehen bileran, diputatu nagusiarekin batera, Denis Itxaso, Maite Peña eta Imanol Lasa diputatuek, eta Maribel Vaquero, Fernando San Martin eta Belen Larrion zuzendariek parte hartu dute –Giza Eskubideak, Lankidetza, eta Haurren Babesa, hurrenez hurren-.

Vaquero eta San Martin izango dira, hain zuzen, Aldundia ordezkatuko dutenak, atzo Eusko Jaurlaritzak bultzatutako erakunde arteko bileran sortuko batzorde interoperatiboan. Gaur arratsaldean egingo du batzorde honek lehen bilera, gobernuz kanpoko erakundeetako ordezkariekin, besteak beste.

Aldundiaren lan taldeak, berriz, honako eginkizunak edukiko ditu: Gipuzkoako baliabide eta azpiegiturak mugiarazi, bideratu eta koordinatu, udalekin eta hirugarren sektoreko elkarteekin elkarlanean; irizpideak bateratu, eta Eusko Jaurlaritzarekin harremanetarako ordezkaritza zuzena ezarri.