Oporren ondorengo lehen hamaboskaria bidean da

Bihar eta etzi artean banatuko da uda ondorengo lehen hamaboskaria harpidedunen etxeetan. 'Andoaingo Gudua irailaren 12an' du izenburu eta egun horretan Andoaingo kaleetan gogoratuko den gertaera historiko haren inguruko azalpenak eman ditu Jon Unanue Larramendi Bazkuneko kideak. Miren Urrutia arraunlari andoaindarrari edota Luis Etxebeste Villabonako Udaleko aparejadoreari eginiko elkarrizketak ere tartean dira. Besteak beste, Juan eta Lazaro Tejeria anaiek Larraulgo herri izaerari eusteko saiakera ekarri dute gogora eta Manex Arrastoa zizurkildarrak udan zehar 1936ko Gerrako aztarnen bila eskualdean bertan eginiko auzolandegiaren inguruan hitz egin du. Kontu bitxi modura, Ernio mendian teleferikoa jartzeko antzinako ideia ere aipagai da aldizkarian.

Hamaboskariarekin batera, udako jaien kronikak eta argazkiak nahiz iristear diren Zizurkil eta Sorabillako festen inguruko berri jasotzen duen gehigarri berezia ere banatuko da.