Ostiral arratsaldean hasi eta igande gauera arte, musika eta festa doinuak nagusitu ziren Kaletxikin. Aurtengoan Sanjuanak eta Kaletxikiko jaien artean astebeteko tartea utzi dute, eta parte hartzeari dagokionez mesedegarria izan dela esan daiteke. Auzokideez gain, herritar asko hurbildu ziren asteburu osoan zehar. Bereziki, igande arratsaldeko auzotarren arteko desafiora.
Azken segunduak ere kontutan hartu behar izan zituzten desafioaren garailea erabakitzeko. Estu-estu ibili ziren Kaletxikiko eta San Esteban auzoko kideak, proba ezberdinetan. Emozio hori ikusleengana iritsi zen eta hainbat unetan gogo biziz entzun ziren baten eta bestearen aldeko animoak. Auzoan bertan geratu zen txapela, oraingoan. Ikusi behar abuztuko errebantxan nor gailentzen den. Goiburuko jaietan esperientzia errepikatuko dute. Proba batzuk aldatuko badira ere, emozioa ziurtatuta izango da. Desafioan adiskidetasun giro ona nagusitu zen, Ontza elkartean partaide guztien arteko afariarekin amaitu zena.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!