Gure Esku Dago ekimenak antolatuta, egun osoko jaia izan zen atzo bost hiriburuetan. Donostian bildu ziren gipuzkoarrak; hantxe ziren, beraz, Beterri-Aiztondo bailarako kideak ere. Festa nagusitu zen goizetik eta Donostiako bost zubi nagusiak batu zituen oihal-kate jendetsua egin zen eguerdian. Anoeta estadio inguruetan bildu ziren gerora Donostiara hurbildutako gehienak, egun osoko festa antolatu baitzen bertan. Arratsaldeko seiretan abiatu zen estadioan bertaratutako milaka pertsonak zain zeuden ekitaldi nagusia:
Jon Maiak, bertso bidez eman zion hasiera arratsaldeko ekitaldiari. Hantxe ziren eskualdeko erraldoi eta buruhandiak nahiz dantzariak ere. Anjel Alkain asteasuarrak Iker Galarzarekin batera umorea erantsi zioten jaiari eta haiek bideratuta, Gure Esku Dago leloa irudikatuz, mosaikoa osatu zuten bertaratutakoek harmailetatik. Giro ona nagusitu zen estadioan eta amaitu aurretik hautetsontzi erraldoia osatu zuten bertan. Anjel Oiarbide ekimenaren ordezkariak, bi umerekin batera erabakitzeko eskubidearen aldeko lehenengo bozka sartu zuten bertan.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!