Maiatzaren 24an herritarrek bozka eman eta gero, hautetsi berriek kargua hartuko dute larunbat goizean. Urnietan ziurtasun osoa dago alkatearen izendapenari dagokionez, Mikel Pagola jeltzaleak gehiengo osoa eskuratu zuelako.
Zinegotzien artean eskarmentu handikoek eta hasiberriek elkar hartuta ekingo diote agintaldi berriari. Maribel Vaquero (EAJ-PNV), Mikel Izagirre (EH Bildu) edota Consuelo Frutos (PSE-EE) zinegotziek ondo baino hobeto ezagutzen dute instituzioaren dinamika. Lehen aldia izango da, ordea, Jorge Segurado (EAJ-PNV), Itziar Artola (EH Bildu) edota Ivan Haro (PSE-EE) hautetsientzat.
ALDERDI BERRIAK ANDOAINEN
Andoainen hautetsi berriz gain alderdi politiko berriak sartuko dira udaletxetan. Ordezkari banarekin Udal politikagintzan murgilduko dira Ganemos eta Irabazi alderdiak. Andoainen ere eskarmentu handikoek eta hasiberriek elkarrekin lan egingo dute. Hasiberrien artean daude Jon Zulueta (EH Bildu), Alvaro Gonzalez (PSE-EE) eta Imanol Goenaga (EAJ-PNV). Esperientzia handiko gizonak dira, berriz, Agustin Alberro (EH Bildu), Daniel Garcia (PSE-EE) eta Iñaki Egibar (EAJ-PNV).
Alkate eta zinegotzien kargu hartze ekitaldia larunbat honetan Andoainen eta Urnietan
Ekainaren 13an abiatuko da Udal agintaldi berria, 2019ra bitarte luzatuko dena. Andoaingo plenoa 10:00etan hasiko da, eta Urnietakoa 11:00etan. Hedabideetan zabaldu denez, alkatetza eskuratzeko PSE-EE eta EAJ-PNVren arteko akordioa dago Andoainen.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!