Atzo iluntzean Kolonbiako egungo egoera aztergai izan zen Villabonako Udalak antolatutako II. Elkartasun astearen baitan. Kolonbian (Bogotan) bizi den EITBko kazetari Arantxi Padilla billabonatarrak, -zuzeneko internet konexio bidez-, eta Kolonbian jaio eta 10 urterekin Euskal Herrira bizitzera etorritako Diana Urrea EH Bilduko legebiltzarkideak hartu zuten hitza. Hitzaldi interesgarria eskaini zuten, bi hizlariek bikain adierazi zituztelarik herrialdea bizitzen ari den bake prozesuaren gakoak nahiz gune ezberdinetan bizi diren kolonbiarren egungo errealitatea. Jende ugari gerturatu zen Subijana etxera; herritarrak, eskualdeko bizilagunak nahiz eskualdetik kanpoko gaiarekin interesatutako pertsonak. Tartean, kolonbiar ugari. Bereziki hunkigarria izan zen haien parte hartzea ere.
Datozen egunetako egitaraua:
Elkartasun astea amaitu aurretik, ondorengo saioak izango dira datozen egunetan:
Ekainak 3, asteazkena
EACNUR elkartearen eskutik, munduko errefuxiatuen inguruko hitzaldia. Subijana etxea, 19:30.
Ekainak 4, osteguna
'Mi bicicleta no me pertenece' dokumentala IKAKA taldearen eskutik. Subijana etxea, 19:30.
Ekainak 10era arte
EACNUR elkartearen eskutik, 'Ancianos refugiados' erakusketa, Gureako erakusgelan.
