“Andoaingo EAJ-PNV gertakari triste bat gaitzesteko beharrean da. Izan ere, alderdikide batek eraso politikoa jasan zuen pasa den asteburuan. Santa Krutz jaietan gertatu zen; gazte talde batek EAJ-PNVko kidea iraindu, mehatxatu eta jo zuen. Biktima lurrean erorita gelditu zen jipoiaren ondorioz. Hori dela eta, ospitalean artatu behar izan zuten, eta erasotua izan den gizonak salaketa jarri du komisarian”.
Atzo -asteartea- EAJk Bozeramaileen Premiazko Batzordea deitzeko eskatu zion alkateari, alderdi guztien artean gertaera gaitzesteko adierazpen instituzionala egiteko. Alkateak ez zion eskaerari bidea eman eta hori dela eta EAJk alkatearen koldarkeria salatu du: "Izan ere, Bozeramaileen Batzordearen helburu bakarra zen gertatutakoa salatu eta biktimari babesa ematea, tankera honetako erasoak berriro gerta ez daitezen”.
EAJren ustean, “pertsonen ideologia eta militantzia ezin da erasoen oinarri izan behin ere. Benetako bizikidetza herritar guztien errespetutik eraiki behar da, bai eta Andoainen gertatu den tankerako eraso tamalgarriaren deslegitimaziotik ere”.
Udal Adierazpenik gabe, EAJ-PNV harremanetan jarri da PSE-EE eta PPrekin hiru alderdien artean adierazpen bateratua egiteko.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
