Andoaingo kirol asteko merezimendu saria

Erabiltzailearen aurpegia Aiurri 2015eko otsailaren 20a

Aurtengo kirol merezimendu sariaren prozesua martxan jartzea erabaki dute Allurralde kirol patronatua osatzen duten kideek. Azken urteetako ohiturari jarraituz, beraz, “Andoaingo edozein herritarrek proposamenak aurkezteko aukera izango du”. Martxoaren 13ra bitarteko epea dago. Herritar bakoitzak, gehienez ere, hautagai baten izena aurkeztu ahal izango du.
Andoain.eus webgunean afitxa prest dago, hura bete eta antolakuntzari helarazi behar zaio. Bi bide  daude:
  •  allurralde@andoain.eus helbidera emaila bidaliz
  • Kiroldegian dagoen kutxan proposamena sartuz.

Kirol merezimendu saria emateko xedea “Andoainen kirolaren promozioan eta sustapenean nabarmendu diren herritarrei” euren lana aitortzea da. Ondorengo arrazoiengatik nabarmendu direnak sarituko dituzte:
  • Herriko kirolaren alde egindako lanagatik.
  • Bere kirol ibilbide pertsonalagatik.
Bozketa prozesua amaituta, aukeraketa egingo dute maiatzaren 11n. Orduan saridunari jakinaraziko zaio eta ondoren herritarrei. Saria Kirol Astearen barruan egingo den ekitaldi berezian jasoko du.
Iaz Andoaingo txirrindulari eskolako Joxe Barberenak jaso zuen saria. 2013an, berriz, Maria Luisa Irizar korrikalari handiak. Eta 2012an Leizaran eskubaloi taldeko Jose Antonio Gutierrez “Guti”k.

Gizartea
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!