Buruntza auzoak baserri eta etxe ugari ditu, 45 hain zuzen, baina axeriak ezin izan ziren denetara iritsi, eguraldi makurra zela medio. Aterrune bakanak probestu zituzten handik hona ibiltzeko ahal bezala.
Soilik San Martin eliza zaharraren inguruko etxeak bisitatu zituzten; besteak beste, Ikutzazarra, Eguzkitza, Arrieta, Elizaldetxiki, Irurainberri, Elizagaratetxiki, Serorategi, Gaztañaga, Gorostidi... Ibibidea murrizte horrek, pena handia eragin zieten urrutien bizi diren auzotarrei.
Ohikoa egiten ari den usadioa errespetatu zuten aurtengoan ere axeri dantzariek: alegia, baserri atarira hurbildu, bertan axeri dantzako joko edo dantzaren bat dantzatu, eta ondoren, etxeko nagusi edo andreari Axeri Dantzaren adierazgarri den zapi zuria jarri lepoan. Zenbat etxe ataritan dantzatu, hainbatetan etxekoek hamaiketakoa edo zizka-mizkaren bat atera zieten axeriei. Gauzak horrela, egundoko jai giroa sortu zen axerien eta auzotarren artean goiz eta eguardian zehar. Ezin bestela izan.
Hurrengo urtean, Goiburu auzoari egokitu zaio axerien puska biltzeari harrera egitea.
Axerien puska biltzea tradizio bilakatzen ari da. Kaldereroen aurreko asteburuan, eta Inauteriak hasteko hamabost egun falta direnean, Axeri dantzako kideak puska biltzean aritzen dira, urtero auzune ezberdinean. Partaideak pozarren agertu ziren, “hirugarrenez bikain aritu ginelako, hirugarrenez gozatu genuelako eta hirugarrenak bihurtzen duelako horrelako ohitura bat tradizio”.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!