Markel Olano Gipuzkoako Aldundirako EAJ-PNVren hautagaia Andoainen izan da gaur, herriko eragile eta enpresekin batzartu eta herritarren beharrak ezagutzeko. Lehen orduan tokiko kazetariekin gosaldu eta gero, teknologian espezializatutako lantegi batzuk eta La Salle Berrozpe lanbide-heziketa zentroa bisitatu ditu. Bistaldi horien ostean, ekonomia suspertzeko langileen prestakuntzak izango duen garrantzia nabarmendu du. Andoainen eta Gipuzkoan industriaren iraultza ematen ari dela adierazteaz gain, aldaketa horretan langile prestatuenek izugarrizko garrantzia izango dutela dio: “Enpresen eraldaketa gertatzeko langile prestatuak behar dira, hau da, espezializazio handia daukatenak, lidergoa izango dutenak eta ingurune zibernetikoa menperatuko dutenak”.
Puntako teknologian espezializatutako Mendiola eta Mendi lantegiak bisitatu ondoren, Andoaingo merkatariak biltzen dituen Salkin elkartearekin batzartu dira EAJren hautagaiak, bai eta Gaztañaga sagardo produktorearekin ere, bi sektore horien errealitatea eta beharrak bertatik bertara ezagutzeko. Arratsaldean, Ubitarte kirol instalazioak eta Karmentxonea jauregia ere bisitatu dituzte.
Bisitaldi guztietan Olanorekin batera egon da Mari Jose Izagirre Andoaingo alkatetzarako hautagaia.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
