Innoforo, eskualdeko eragileen topaleku berria

“Innoforoa tokiko eragileen parte hartzerako gunea da, eskualdean enplegua sortzeko aukerak definitu eta zehazteko helburua duena. Eskualdeko eragile sozioekonomikoen topaketarako espazio parte hartzailea da, Donostia-Beterriren garapen endogenoko ardatz estrategikoak identifikatzea xede duena. Enplegua sortu eta jarduera ekonomikoa sustatzeko ekimen zehatz eta praktiko berriak abian jartzeko helburuaz gain, eskualdearen garapen sozioekonomikorako laguntza politika publikoak definitzekoa ere badu.

• • Ez da azterketak egiteko foroa.
• • Ez da gerora dokumentu batean jasotzeko helburuarekin iritziak eskatu eta biltzeko foroa.
• • Ez da eskualdeko eragileak bildu eta Donostia-Beterrik dituen arazoei buruz eztabaidan jartzeko foroa ere.

Innoforoa ekonomia suspertzeko aukera berriak sortzeko tresna da; enpresen eta tokiko eragileen artean elkarlanean aritzekoa; ondorengo urteotan jarduera sozioekonomikoa eta enplegua sortuko duten proiektu berriei bultzada emateko tresna. Gisa honetako ekintzak aurreikusten dira horretarako:

1. Eskualdeko sektore estrategikoak zein gorako bidean direnak identifikatzea.
2. Tokiko garapen koherenterako estrategia definitzea.
3. Aukera-esparruak identifikatzea.
4. Aukera nahiz ekimenak zehaztu eta abian jartzea.
5. Tokiko garapenerako politika bideragarriak identifikatzea.

Eskualdeko udal guztiek (Hernani, Andoain, Lasarte-Oria, Usurbil, Astigarraga eta Urnieta) elkarrekin bultzatutako ekimen honek, Gipuzkoako Foru Aldundiaren Berrikuntza, Landa Garapen eta Turismo Departamentuaren laguntza du.

Ekimen berri bezain praktiko honen aurkezpena azaroaren 20an egingo dugu, 17:30ean Lasarte-Orian (Villa Mirentxu, Areto Nagusia). Gonbidaturik zaudete, bai aurkezpen ekitaldira bai Innoforoan aktiboki parte hartzera”.

17:30 Villa Mirentxu
Lasarte-Oria
Azaroak 20, osteguna