Berdintasuna helburu duen parte hartze prozesu berria burutzen ari dira hamabostaldi honetan

“Kaleak ez dira trantsizio espazioak soilik, erlazioak sortzen diren tokiak dira, herritarrak sozializatzeko eta bizitzeko. Horretarako, denontzako segurtasuna eta erosotasuna behar dugu: argi gehiago leku batzuetan, garraio publikoa herrian mugitzeko…”, azaldu du Ana Carrere alkateak.
Helburua herriaren diagnosia egitea da. “Herritaren ikuspegia jaso eta egoera zein den ezagututa, hortik abiatzea, herritarrekin Andoaingo hirigintzan hausnartzea, gai honen inguruan sentsibilizatu eta trebatzea, eta ekarpen konkretuak lantzea dira helburu nagusiak. Diagnostikoa egingo dugu, beharrak zeintzuk diren identifikatuz eta ondoren, irtenbide posibleak proposatuko ditugu”, azaldu du Naiara Arri aholkulariak.
Helburu horiek metodologia parte hartzaile baten bidez lortu nahi dituzte, oinarrian herritarren iritziak egon daitezen. Andoaindarren eguneroko bizitzatik, jarreretatik eta ohituretatik abiatu nahi dute, Andoain nola bizi duten jakiteko. “Bereziki emakumeak eta berdintasunaren alde lan egiten duten eragileek zelan bizi duten jakin nahi dugu, horren araberako konponbideak ere proposatu ahal izateko”.
Prozesuak bi fase izango ditu. Lehenengoan, Andoainen hobetu beharreko puntuak identifikatu beharko dituzte mapa batean. Fase hau tailer horien bidez gauzatuko da eta gabonen aurretik amaituko da. Ondoren, bigarren fasea hasiko da eta bertan konponbideak proposatu beharko dituzte. Proposamen guztiak bildu eta horren aurrean Udalak zein irtenbide izango duen erabakiko du.
Zer esanik ez dago Udalak herritarrak parte hartzera gonbidatu dituela.

Bost tailer
18 urtetik gorakoak.
18:30. Gaztetxea.
Azaroak 17, astelehena.

60 urtetik gorakoak.
17:00. Bertxin.
Azaroak 18, asteartea.

Gazte Lokaleko kideak.
18:00. Gazte Lokala.
Azaroak 20, osteguna.

Berdintasun kontseilukoak.
18:30. Urigain.
Azaroak 24, astelehena.

Deialdi irekia.
18:30. Bastero.
Azaroak 26, asteazkena.