Hondakinen tasan aldaketak egingo dituela jakinarazi du Udalak

Erabiltzailearen aurpegia Aiurri 2014ko aza. 10a, 13:18

Udal tasak onartzeko garaia iritsi da, aldaketa bat iragarri dute udaleko kideek: “atez atekoaren eta konpostaiaren bidez birziklatzen duen zizurkildarren gehiengoak hondakinen tasa murriztua izango du aurrerantzean, Tolosaldeko hondakinen mankomunitatearen ordenantzan jasotzen den aukera baliatuz. Aitzitik, hondakinak bide publikoan bereizi gabe uzten jarraitzen duten herritarrei Udal tasa berria aplikatuko zaie, oso-osorik. Aurreko urtekoarekin alderatuta %30 inguruko igoera dakar oraingo tasak. Kopuru hori zabor nahasia bildu eta zabortegira eramateak Udaleko diru-kutxan eragiten duen gain kostuarekiko proportzionala da. Udalak uste du herritarren gehiengoak ez dutela zertan jasan batzuek bide publikoan hondakinak bereizi gabe uzteagatik eragiten duten gain kostua”.

Prentsa ohar baten bidez jakinarazi dutenez, “tasa horiek ez dira finkoak, hau da, herritar bat birziklatzen hasten denean tasaren murrizketa aplikatuko zaio. Hilabetero arduratuko da Zizurkilgo Udala tarifa murrizketa jasoko dutenen zerrenda eguneratua edukitzeaz eta irakurketen erregulartasuna frogatzeaz, Beraz, hiruhilabeteko zerga aldakorra izan daiteke. Tarifa murrizketaren onuradun izateko mankomunitateko ordenantzak ezarritakoaren arabera kudeatu behar dira hondakinak”. Hondakinen gaineko tasen inguruko aldaketak iragartzeaz gain, gainerako tasak mantendu egingo dituztela jakinarazi dute.

 

Gizartea Zizurkil
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!