Mintzalagun eta Gurasolagun izeneko kanpainen hasiera ekitaldia ospatu zuten Bastero Plazan, aurreko larunbat eguerdian. Andoaingo Udaleko euskara zerbitzuak eta AEK euskaltegiak elkarlanean antolatu zuten jaialdia. Pasta eta kafe baten inguruan, euskara bereganatu nahian dabiltzanak eta horiei bultzada ematen dieten euskaldun boluntarioak bildu ziren.
Antzerkia | Bakarrizketa | Informazio gehiago:
Kris Bernal Andoaingo AEK euskaltegiko irakasleak aurkezpenean adierazi zuenez, Mintzalagun eta Gurasolagun 2011n jarri ziren abian, euskara kaleratzerako orduan lagungarri izan zitezkeelako, “ahalegin txikia eskatzen zaio bi ekimen horietan parte hartzen duenari, astean ordubeteko dedikazioa. Horrekin, euskaldunek euskara gehiago erabiltzea kalean eta aldi berean euskara ikasleak inguru euskaldunago bat topatzea eta berak ere euskaraz mintzatzeko aukera gehiago edukitzea lortzen da”.
Bernalek gogorarazi zuenez, bi ekimenak martxan diren arren, irekita jarraitzen du izena emateko epeak. Nahikoa da Andoaingo Udalarekin edota AEK euskaltegiarekin harremanetan jartzea horretarako.
Ainara Rodriguez euskara zinegotziak kale erabileraren inguruan Andoainen egin den azken inkesta hartu zuen gogoan, ekitaldian zehar: “inkestak, euskara %18a erabiltzen dela adierazten digu, eta benetan datu kezkagarria da hori. Izan ere, andoaindarrak datu hori baikorrago bihurtzeko gaitasuna badugu. Mintzalagun eta Gurasolagun bezalako ekimenak gaitasun horren adierazleak direla iruditzen zait”.
Ekitaldian zehar, antzerkiari eta ipuinari lotutako ikuskizunez gozatu ahal izan zuten bertaratutakoek.
Estitxu Garmendia eta Mailu Arruti antzezleek formato txikiko antzerki lana eskaini zuten. Ironia erabiliz, euskararen ikasketan gertatzen diren pasadizoetan oinarritu zuten antzezlana, ikusleen barreak eraginez.
Gregorio Olasagasti mintzalaguna den aldetik, ipuin kontalari gisa deskubritzeko aukera ere eman zuen ekitaldiak. Euskara aberatsa eta hitz jario arina dauka, bizia, eta kontalaritzaren bidetik jarraitzen badu, zer esana eman dezake.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!