Euskara praktikatzeko ibilaldiak antolatu ditu Banaiz Bagara elkarteak Andoain eta Urnietan. Udan ere hizkuntza praktikatu ahal izateko ordubete inguruko ibilaldiak egingo dituzte, eta urtean zehar ikasitakoari jarraipena emateaz gain, jende berria ezagutzeko eta herria beste modu batera ikusteko aukera izango dute parte hartzen duten herritarrek.
Bideoa | Kronika:
Topaleku batetik abiatuta, norabide ezberdineko ibilaldiak egingo dituzte 5-10 lagun inguruko taldetan. Hala ere, taldeek ez dute mugarik izango, ibilaldian zehar talde txikiak sortzen direlako. Banaiz Bagara elkarteko Petra Elser irakasleak adierazi duenez, eskola eredutik kanpo egoteak beste sentsazio bat ematen du eta hizkuntza komunikazio tresna gisa ulertzen da: “Ibilaldiek jendea hitz egitera bultzatzen dute. Ahoz eta entzumenez ikastea oso bide ona eta baliagarria da”.
Abuztuaren 17ra bitartean, Andoainen Jubilatuen Egoitzan elkartuko dira ostiraletan, 15:30ean, eta Urnietan, berriz, Lekaio Kultur Etxean bilduko dira astean bitan; astelehenetan 09:15ean eta ostegunetan 19:30ean. Ibilaldi hauetan parte hartzeko ez dago izena eman beharrik eta abiapuntura agertzea nahikoa izango da.
Petrak adierazi duenez, parte hartzea doakoa eta irekia da: “Edornok parte hartu dezake egitasmoan eta gonbidatuta daude euskaraz hitz batzuk soilik egin ditzaketenak, maila hobea dutenak, euskaldun zaharrak, atzerritarrak eta baita hitz batzuk elkarbanatu nahi dituzten euskaldunak ere. Denak izango dira ongi etorriak. Kontua pertsona mota ezberdinak nahastea da: gazteak, zaharragoak, emakumeak, gizonezkoak, atzerritarrak, euskaldunak...”. Beraz, euskaraz hitz egiteko borondatea duen edonork hartu dezake parte.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!