"Gerra Zibila 1936-1937" auzolandegian parte hartzen ari diren gazteak Aduna, Zizurkil eta Asteasuko oroimen historikoaren berreskurapenean lanean dabiltza. Gaur, Belkoain mendiko lubakietan izan dira Javi Buces Aranzadi Zientzia Elkarteko historialaria, Iñaki Alegria UEUko zuzendaria, Mertxe Aizpurua Udalbiltzako lehendakaria eta Martin Garitano, besteak beste.
18 eta 30 urte bitarteko gazteak boluntario dabiltza lanean, uztailaren 7tik 20ra bitarte. Gehienak gipuzkoarrak diren arren, Bizkaia, Nafarroa eta Arabatik etorritakoak ere badaude tartean. Guztiak, dena den, historian interesatuak dira; historiako ikasketak edo antropologiakoak egiten dabiltzanak. Goiz eta arratsalde dabiltza lubakiak aztertzen. "Sasiak garbitzen, lurra kentzen, enbor zatiak botatzen... garbiketa lana egiten ari gara. Gogorrena makurtuta egotea da, baina gustura ari gara lanean", dio parte-hartzaile batek.
Martin Garitanok azaldu duenez, asmoa memoria historikoa berreskuratzea da: "Bigarren urtez Lubakiak berreskuratzen ari dira Adunan. Gure asmoa da memoria historikoa berreskuratzea. Inoiz ez dadila ahaztu gertatutakoa: nola demokrazia suntsitu egin zuten, nola euskaldunon askatasun guztiak zapaldu egin zituzten 40 urtez..."
Hala eta guztiz ere, ustiaketa lanaz gain, Aduna, Zizurkil eta Asteasuko herritarren testigantzak jasotzen ari dira, 1936ko gerrako gatazka eta gertaerak gogoratu eta historia hori gaurkotzeko. Gainera, txangoak egiten dituzte, memoria historikoaren leku esanguratsuetara, eta hitzaldiak ere jaso dituzte Aranzadiko adituen eskutik.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!