Urnietan ezer ez eta festa, dio esaerak. Bada, San Juan plazan edota Saroben izan zirenentzat arratsalde gogoangarria izan zen. Minutu gutxitan gertatu zen dena. Autobus batek Katalunia aldetik zekarren taldea Jakutegi plaza ondoan geratu, Sarobeko kanpoaldean jantziei azken ukituak eman eta azkar batean San Juan plazara hurbildu ziren ikusleak harri eta lur utzi zituzten. Zerura begira jarri zituzten denak, eta zerua eta lurraren artean gizakiez eraikitako dorre eta harresi ikusgarriak.
Irudiek ikusgarritasuna izanik ere, norberaren begiekin Vilafrankako zapelatzek egin zutena ikustea esperientzia zirraragarria izan zen. Emoziorik ere ez zen falta. Figura ezberdinak osatzeko garaian, giza ilarak erantsi ahala oreka ez galtzeko ahalegina handia eta ikusgarria zelako. Urduritasuna bertakoen kontua zen, Kataluniatik etorritako kideen artean lasaitasun eta patsada handia nabari zelako. Eta hala eta guztiz ere ikusleak urduri jartzea lortu zuten. Bereziki, kasko beltza jantzita zeraman haurtxoa inolako segurtasun neurririk gabe gora eta gora zihoala ikustean.
“In fusioak” jaialdiaren baitan, Egape dantza taldearen bi saioen artean, Falcons de Vilafranca taldeak sekulako erakustaldia eskaini zuen. Falcons edo zapelatzak ekartzeko ideia izan zuenari zorionak eman behar zaizkio inguru hauetan sekula ikusi gabeko ikuskizuna ekarri zutelako. Pena, eta galanta, plazara hurbildu ez zirenena da.