Hilabetean behin, Oiartzungo Elikagai Bankura joan, eta Asteasun premian dauden familien zerrenda eskuan, beharrezko elikagaiak ekartzen dituzte. Lizardi etxean elkartzen dira bolondresak, ekarritako elikagaiak antolatu eta eskaera egin duen familia bakoitzarentzat sorta bana prestatzeko. Bi bolondresen lana izaten da familia horiei harrera egin eta dagokien sorta ematea.
Horrez gain, Eguberrietan, elikagai bilketa egin zuten Asteasun bertan. Bildutako guztia Oiartzungo zentralera bideratu zuten: “Akordioa dugu haiekin, eta ezin dugu hemen bildutakoa bertan banatu. Nolanahi ere, garbi daukagu askoz ere elikagai gehiago ekarri dugula Oiartzundik, guk hara eraman genuena baino”, azaldu dute kideek.
Helduen taldea
Herrian sumatutako beste premia bati ere erantzun dio bolondres taldeak: “Bakarrik bizi diren adinekoen artean, bakardade arazoak antzeman genituen, eta horri irtenbidea eman nahi izan genion”, azaldu dute. 65 urtetik gorako pertsonekin zerbait antolatzen hasteko gogoa piztu zen bolondresen artean. Gonbidapenak bidali zizkieten bakarrik bizi diren herritarrei eta lehen bilera egin zuten otsailean.
Herriko helduekin landu beharreko ekimena otsailean hasi eta ekainean amaitzea zen hasierako asmoa, baina luzatu egingo dute: “Oso gustura dabiltza eta uztailean ere bildu egingo gara. Behin uda pasata, irailean ekingo diogu berriz ere. Esan beharra dago, bestalde, Asteasuko emakume taldea ere parte hartzen ari dela ekimen honetan. Elkarlanean ari gara eta hori ere oso aberasgarria da; parte hartzea, auzolana, sentsibilizazioa, 65 urtetik gorakoen agerpena..., hori guztia lantzen ari gara guztien artean”.
Dagoeneko, 65 urtetik gorakoen taldetxoak finkotasuna hartu du. “Hilean behin biltzen gara, 25 bat heldurekin. Otsailean gure asmoen aurkezpena egin genien, beti ere askari baten inguruan. Martxoan, joko ezberdinen bidez taldea sendotzeko lana egin genuen. Apirilean bide horri jarraitu genion eta maiatzean umorezko tailerra egin genuen. Oso gustura aritu ziren; oso balorazio ona egin dute. Afari merienda ere egin genuen elkartean. Aurrerantzean ere, parte hartu nahi duenarentzat guztiz irekita egongo da ekimena”. Udalarekin elkarlanean ari dira bolondresak eta haien babesa dute euren ekintzak antolatzeko. “Udalak martxan du “Ibilbide osasuntsuak” izeneko ekimena. Helduen taldeko kideei ibilbide horien diseinuetan parte hartzeko gonbita luzatu genien, eta gogotsu azaldu ziren. Ekaineko bileran jasoko ditugu haien proposamenak”, azaldu dute.
Bolondres berriak
“Ahoz ahoko lanari esker, bolondres kopurua hazi egin da. Norbaitek parte hartu nahiko balu, ateak guztiz zabalik ditu. Hileko bigarren astelehenetan biltzen gara Lizardi etxean, 18:30etatik aurrera. Horrelako ekimenak oso garrantzitsuak dira herri egitura sendotzeko garaian eta gerturatzen diren guztiak ongi etorriak izango dira. Herrian landu beharreko beste gai batzuk edota ideia berriak sor daitezke hortik eta gu zabalik gaude”.