Garagardoa eta rock musika

Erabiltzailearen aurpegia Aiurri 2014ko eka. 11a, 12:19

San Juan jaien atarikoa izango da, iaz bezala, Gazteleku pilota eskolak eta Ontzerrik antolatu duten Garagardo Azoka. Ostegunetik igandera, nazioarteko garagardo eskaintza oparoa dastatu ahal izango da.
Larunbat gauean, gainera, garagardoak osagarri bikaina izango du: rock musika. Andoaingo rock jaialdiaren edizio berria ospatuko da, andoaindarren artean geroz eta interes handiagoa pizten duena.

Larunbat honetan –ekainak 14– arratsaldeko 18:00etatik aurrera Andoaingo rock jaialdiaren zazpigarren edizioa burutuko da Nafarroa plazan. Rock jaialdiaren zazpigarrenarekin batera, Garagardo azokaren bigarrena ospatuko da. Biak ala biak jarduera osagarriak. Iaz, kanpotik etorritako rockzale askok ez zuten azokaren berri izan. Ea aurten bi jarduerak elkar osatzen diren. Andoaindar askok eskaintza bikoitzaz gozatu ahal izan zuten, eta aurten errepikatzeko asmoa izango dute.
Garai bateko nazioarteko taldeak ekartzeko ohitura dute antolatzaileek. Bat baino gehiago aiton-amon izateko adinean izango da. Talde gazteagoak ere ikus daitezke eta, aurten, denen gainetik Kaliforniako Bellrays taldea aipatu behar da. Azken urteetan Bilboko Kafe Antzokia bezalako aretoetan jendetza erakarri dute, haien zuzenekoa ikusgarria baita.
Hori pagotxa hori, rocka maite dutenentzat! Dohainik, gainera. Antolatzaileek jaialdian parte hartuko duten sei taldeak horrela definitu dituzte:

The Bellrays
Kalifornia, AEB
“Lisa Kekaula eta abarrek denda batetara sartu eta aurkitu nahiko zenukeen diskoa egin dute, eta kontzertu batean entzun nahiko zenukeena. Let It Blast (98) edo beraien aurreko lana den Hard Sweet And Sticky bezalako lanekin ezagutu zutenen bihotzean kokaturik, oraingoan gure instinto baxuenengana jo dute, urdaila eta hankartea golpatuz: nahastezin bihurtzen dituen soul musika galdu gabe, hamar ereserki erditu dituzte”.

The Woggles
Georgia, AEB
“Dauden garage banda zaharren artean, aktiboan jarraitzen duenlaukotea da oholtza gainean apustu ziurra da”. 

The Ape
Australia
“Beasts of Bourbon talde ezagunean kantari aritutakoa da Tex Perkins The Ape taldeko arima”.

Kid Congo and 
The Pink Monkey Birds
AEB
“Zuzeneko ikusgarria duen taldea, dantzaz beteriko festa handi baterako”.

The Lookers
Ziburu, Lapurdi
“Ziburuko hirukote gaztea  garage-punk-rock giroko azken sentsazioa dira”. The Sonics, New York Dolls edo Pixies bezalako taldeen jarraitzaileak.

Bakelite
Euskal Herria
Sergio Llanos (Atom Rumba) eta Naiara Anasagasti (Paniks) bikoteak sortutako proiektua da. Naiara kantariak bateria eta gitarra jotzen ditu txandaka. Sergiok gitarra jotzen du eta ahotsetan laguntzen dio.
Gizartea
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!