Bete beharreko baldintza bakarra esku pilotan aritzeko gogoa izatea da. Izen emateak, bikote bakoitzeko 10 euroko balioa du, baina sariak ere ez dira nolanahikoak izango. Irabazleak, txapela, kopa 100 euro eta afaria bereganatuko ditu. Azpitxapeldunak, kopa, 50 euro eta afaria. Hirugarren eta laugarren geratzen diren bikoteek, afari bana irabaziko dute. Lehenengo bikote zizurkildarrak berriz, 30 euro eskuratuko ditu. Izena emateko telefono hauetara dei daiteke: 616 961 153 edo 649 703 472.
Frontoi berezia
Beste zenbait herritan bezala, zimiterioa da jatorriz Zizurkilek pelotan ibiltzeko zuen txokoa. Oso frontoi berezia da; alturaz baxuagoa, bost kuadro besterik ez ditu, eta atzeko pareta erdiraino soilik iristen da. Alboetan bi poste daude gainera, pilotarien jarduna baldintza dezaketenak.
Iaz, hamasei bikotek parte hartu zuen txapelketa berezi honetan. Aurten ere, nahi duen edonork aukera paregabea izango du frontoi honen xarmaz gozatzeko. Kanporaketa partidak larunbat arratsaldetan izan ohi dira eta finala berriz, ohi bezala, Zizurkilgo Amabirjin jaietan jokatuko da, aurten, abuztuaren 16an. Gauez jokatzen da finala eta jendetza hurbiltzen da ikuskizunaz gozatzera.