Antia Literatur lehiaketaren XX. edizioko sari banaketa ekitaldia izan zen maiatzaren 16an, ostiralean, Urnietako Gaztelekuan. Aurten, beste behin ere, jende askotxo bildu zen irabazleen izen-abizenak jakiteko asmoz.
Bi kategoria egon ziren lehiaketan; batetik, haurren kategoria, Lehen Hezkuntzako ikasleentzat eta, bestetik, gazteen kategoria, 12 urtetik 16 urte bitartekoentzat.
Haurren kategoriako irabazlea Maitane Arretxe izan zen, “Heriotzaren bidea” idazlanarekin. Bigarren saria Olatz Gorroñoren “Begira ezazu aurrera” idazlanak jaso zuen eta, azkenik, hirugarrena Gorane Cobasen “Mundu hobeago bat” lanak.
Bestalde, gazteen kategorian, Naroa Agirreren “Maitasunetik maiteminera” izendatu zuten irabazle. 600 euroko saria jaso zuen. Bigarrena Aritz Lekuona izan zen, “Bihurgune Biziduna” idazlanarekin. 360 euro irabazi zituen. Azkenik, 180 euroko saria eta hirugarren postua Olatz Goyak lortu zuen “Bizitza aldatu zion begirada” lanarekin.