Etiopiara joateko deialdia, herriko gazteei zuzendua

Erabiltzailearen aurpegia Aiurri 2014ko maiatzaren 22a

Urnietako Udalak eta Misio batzordeak Etiopia Utopia elkartearen bitartez, Wukro aldera bolondres modura joateko bekaren bigarren edizioa martxan jarri dute. Esan beharrik ez dago herriko gazte guztiak deialdian parte hartzera deituta daudela. Iazko edizioan Maialen Hernanez Fernandez izan zen Afrika aldera abiatu zen gaztea, eta hauxe izan zen itzuleran Aiurriri azaldutakoa: “Gauza ugari ikusi eta ikasteko aukera izan dut hiru hilabetetan. Itzuli naizenetik, hemen dudan bizimodua hangoarekin alderatu ohi dut maiz. Egia esan, han, gutxiagorekin, alaitasun eta irribarre gehiago ikusten da. Horrelako xehetasunek hausnarketa sakonera naramate”. Esperientzia bizitzeko gonbitea egiten zuen, era berean: “Edonor joan daiteke; eta hemengo lan egoera ikusita, jende gaztearentzat aukera paregabea dela iruditzen zait”.

Bada, bigarren deialdia martxan jarri dute. Aukeratuak hiru hilabeteko egondaldia egingo du Etiopiako Wukron. Bete beharreko baldintzak honakoak dira: 
1. Unibertsitateko titulua, lanbide heziketa edo lanbide batean esperientzia  (iturgina, igeltseroa, elektrizista) izatea.
2. Komunikatzeko oinarrizko ingeles maila izatea.
3. Urnietan bizi edo jaio izana.
4. Lanerako eta ikasteko gogoa.
Izen-ematea
Kurrikuluma e-postara bidali  edo Gazte Informazio Bulegoan utzi. Epea ekainaren 20an amaitzen da. Argibideak: Jose Ramon Jauregi. 943 33 13 46.
8:00-13:00 / 17:00-19:00.
Deialdia Urnietako Parrokiak, Etiopia Utopia Fundazioak eta Urnietako Udalak egin dute.

Gizartea Urnieta
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!