LAB sindikatuak maiatzaren lehenaren harira argitara eman duen oharraren arabera, “krisia iruzur handi bat da, iruzur bat bestearen atzetik hasieratik: Krisitik ateratzeko guztion ahalegina behar dela esaten zitzaigun behin eta berriz. Gezurra. Irabaziak pribatizatu zituztelako, kalteak sozializatuz. Ez dugu guztiok berdin ordaindu: aberatsak aberatsagoak, pobreak pobreagoak direlako. Espekulatzaileek negozioa egiten jarraitzeko bide berriak aurkitu dituzte”.
Sindikatuak burujabetzan aurkituko luke irtenbidea. Horixe euren eskaera: “Irtenbide propio bat eskatzen dugu, burujabetza prozesu bat, España markari eta gaurko politikei loturik ez jarraitzeko. Burujabetza ekonomikoa, soziala eta politikoa aldarrikatzen dugu. Guri dagokigu erabakitzea Euskal Herrian nola sortu, banatu eta antolatu nahi dugun aberastasuna”.
Maiatzaren lehenean langileen aldeko eskubideak aldarrikatuko dituzte sindikatu ezberdinek. Hernanin LAB sindikatuak eskualde mailako manifestazioa deitu du, Hernaniko Gudarien plazatik eguerdiko 12:00etan abiatuko dena. Manifestazioa amaituta, ekitaldia antolatuko dute Ezkiaga pasealekuko Tilosetan.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!